Tasiilami katsorsaavik nutaaq
Ikiaroornartumik, imigassamik aningaasanoorajunnerlu pillugit atornerluineq, taamatullu kinguaassiutitigut atornerlunneqarsimaneq pillugu, Tasiilami katsorsaavimmi nutaami Artsarnermi katsorsaasoqarsinnaalerpoq.
Tasiilami katsorsaafik nutaaq Artsarner ammarneqarpoq.
Artsarner imigassamik, aanngajaarniutinik aningaasanoornermillu atornerliunermut katsorsaavittut atorneqassaaq, taassumalu saniatigut meeqqat kinguaassiutitigut atornerlugaasimasut kinguaassiuutitigullu atornerlugaasimasunut kingunerlutsitsisunut katsorsartinnissamut periarfissaqartitsissalluni. Pisariaqartillugu innuttaasullu soqutiginnissappata Artsarner arnanut højskoletut aamma atorneqarsinnaassaaq , Kommuneqarfik Sermersooq nittartakkamini taama allappoq.
- Katsorsaavittaap atulerneratigut Tasiilami innuttaasut, ilaquttatik suliffitillu qimannagit katsorsarneqarsinnaanissaminnik periarfississavai. Tamanna innuttaasunut alloriarneruvoq annertooq, Charlotte Ludvigsen (IA) nittartakkami oqarpoq.
Katsorsaafiup aqqa 'Artsarner' illoqarfimmi innuttaasut unammisinneratigut nassaarineqarsimavoq.
- Unnukkut ussernartoq tikiuttarpoq, imerusunneq inukkarusunnerlu, kisianni unnukkut silagitsillugu arsarnerit takuneqarsinnaapput, ilaat qaamanerupput ilaallu taarnerullutik, ilaallu kipisaqattaarsinnaasarlutik, arsarnerit isiginnaarlugit isummerfigineqarsinnaasut, tassa inuuneq taamatut ilungersortigisinnaavoq qaammartarlunilu taartissinnaasarpoq, Louis Jonathansen atissamut siunnersuuteqarnermini tunngavilersuilluni allappoq.
Tasiilami innuttaasut katsorsaaviup januaarip 21-ani ammarneqarnissaanut aggersarneqarsimapput.