Skip to main content

Tasiilami inuusuttut namminneq kulturikkut illoqalissapput

Tasiilami inuusuttut namminneq immikkuullarissumik kulturikkut illorsuartaassapput. Lokale og Anlægsfonden suliniummut 3 millionit koruuninik aningaasaliissuteqarpoq, taanna qaammatini 18-ini kingullerni suliniuteqarfigineqarsimavoq.

Tasiilami inuusuttut inuusuttut kulturikkut illussaannut pissanganartumut qilanaarutissaqarput, taanna illussanik titartaasartup Sophus Søbyep titartagaraa.

Suliassap pilersaarusiornera
Sanaartugassap pissanganartup pilersaarusiorneqarnera Lokale og Anlægsfondenimit illoqarfimmi meeqqat inuusuttut, Kommuneqarfik Sermersooq aamma illussanik titartaasartoq suleqatigalugu ineriartortinneqarsimavoq.

- Inuusuttut illuat Tasiilami meeqqat inuusuttullu sunngiffimmi sammisaqarlutik toqqissisimallutik ataatsimoorfissarissavaat. Takorluugaannik aamma inuunermi anguniagaannik nukittorsaataaqataasinnaapput, kisianni aamma nuannisarlutik eqqissisimaarsinnaallutik. Inuusuttut kulturikkut illuat aamma innuttaasut tamarmik iluaqutigisinnaassavaat, soorlu kinguaariit tamarmik sammisaqarfigisinnaallugu, tamanna Lokale og Anlægsfondenip tusagassiuutinut nalunaarutaani atuarneqarsinnaavoq.

Sammisassarpassuusinnaasuni nipilersorneq, qitinneq, issittumi pinnguaatit, isiginnaartitsinerit, erinarsornermut oqaluttuaqattaarnernut, allannermut workshop, assiliisarfittut, qalipaasarfittut, saqqummersitsivittut, tammoorfittut, tupilaliorfittut, mersortarfittut aamma qamutiliornermut qaanniornermullu atorneqarsinnaanera oqaatigineqarpoq. Aammattaaq ilinniartitsisunik tikeraanit street artimik, filmiliornermik aamma isiginnaartitsinermik workshopertitsisoqartassaaq.

Sannavik, sungiusartarfik aamma lounge
Illu allaffeqarfiup isateriaannaassup toqqaviani sanaartorneqassaaq, umiarsualivimmut, kangerlummut aamma qooqqumut isikkiveqarluni. Illup nutaap toqqavia portussaaq, taamaalilluni ataanik kiassakkamik sannavimmik toqqaannartumik aneertarfimmut aniffissaassalluni. Illup ataani aamma nipilersortarfeqassaaq immiussisarfiutigisumik.

Inimi angisuunik pinnngortitamut isikkivilinnik igalaaqassaaq. Tassani angisuumik isersimaartarfeqassaaq, café, qitillunilu sammisaqartarfik aamma allaffik anartarfiillu. Qaliani minnerusumik isersimaartarfeqassaaq. Suliniut katillugu 181 m²-iussaaq aamma 100 m²-imik kujammut sammisumik aneersuartarfeqassaaq.

Kalaallit siunnersortit
Suliniut Sophus Søbye Arkitekterimit titartarneqarpoq, kalaallit siunnersortit Titarneq aamma Rambøll Greenland suleqatigalugit. Suliniutip pilersinneqarnera katillugu 6 millionit koruuninik akeqassaaq. Lokale og Anlægsfonden 3 millioninik tapiissaaq.

- Inuusuttut naapiffimmik kissaateqarnerat tapersersussallugu uannut pingaartorujussuuvoq, tamatuma piginnaasaminnik atuiffiginninnissaminnut periarfississavai. Naapiffik qanga pisut aamma maanna pisut ataatsimoortillugit inuusuttut namminneq tulluusimaarutigalugu nutaamik nassuiaasersorlugu ingerlatitseqqiffigisassaat. Tamatuma saniatigut aamma inuusuttut illuata illoqarfimmi innuttaasut tamarmik ataatsimoornerannut nukittorsaanissamut periarfississavai – inuusuttut namminneq takorluugaat kisimik killiliissapput, Asii Chemnitz Narup oqarpoq.

Ataqatigiinneq paaseqatigiinnerlu
Anette Molbech, suliniutip Siunissaq uagut pigaarput (The Future Belongs to Us) pisortaa, suliniut pillugu oqarpoq:

- Lokale og Anlægsfondenip aningaasaliineratigut Kalaallit Nunaanni inuusuttunut naqissuserparput, siunnerfeqarluni aamma ataatsimoorussilluni suligaanni isumassarsiaq annertooq piviusunngorsinnaasoq. Suliniutip Siunissaq Tasiilami inuusuttut, kommunip aamma danskit aningaasaateqarfiisa akornanni ataqatigiinnermik pilersitsinerata, inuusuttut tusaaneqartutut, takuneqartutut ataqqineqartutullu misiginerannik kinguneqarput. Ataatsimoornermik nukittorsaasinnaammata pingaaruteqarput, Tasiilamilu meeqqat inuusuttullu akornanni ataatsimut atugaannut tapertaasinnaallutik. Inuusuttut Tasiilaq nammalertussaavaat – taammaammat takorluukkanik piviusunngortitseqataanermik misigisaqarnerat pingaarutilerujussuuvoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER