Tasiilami inuusuttut akisussaaffimmik tigusisut
Qaammatip ataatsip ingerlanerinnaani aappassaanik, Tasiilaq kusanarnerulerlunilu saligaannerulersimasoq innuttaasut takusinnaalerpaat. Taamaanneranut inuusuttut ilungersuussiumatuut qutsavissaraat.
Inuusuttunnguit qungujulasut nukissallillu Tasiilami maangaannaq eqqakkanik ikinnerulersitseqqipput, illoqarfimmilu aneernissaq nuannernerulersillugu. Kommuneqarfik Sermersooq tusagssiorfinnut nalunaaruteqarnermi allappoq.
Inuusuttut Kulturikkut Illorsuaanni Igdlomi, ataatsimoorussilluni saliinermi siuttooqqipput, namminneq kajumissutsiminnik suleqataasut 100-t sinnillit suleqatigiinnut arfineq-marlunnut avillutik tamarmik immikkoortortanik saleerrammata.
Suleqatigiilluaqqittut
Kingullermik saliisoqarmat Materielgården eqqakkanik katersanik igitsiartortuusarpoq, aammalu allaffimmi betjentit imermik puussiarsuarnillu suleqataasut amigaateqannginnissaat isumagalugit. Taamatut suleqatigiinneq iluatsilluariarmat, aamma soorunami maannakkut nangeqqinneqarpoq.
Kingullermik saliinermisut, kajumissutsiminnik suleqataasut akornannit pinnatassanik makitsisoqarpoq, taakkulu akornanniipput sinngup puui, toqqit nammattakkallu.
- Qungujulaartut amerlinerulereerput, aammalu Najukkami Ataatsimiititaliap tungaaniit kajumissutsimik suleqataasut qutsavigineqarput, taakkuummatami Tasiilamik illoqarfittut nuannernerulersitseqqittut. Qujanarujussuaq, Kommuneqarfik Sermersooq allappoq.