Tasiilami innuttaasut inigisaminnut uteqqissimasut
Upalungaarsimasut Tasiilami najugaqarfiup nunap sisoorneranit eqqugaasimasup eqqaani assaareernerisigut, innuttaasut angerlarsimaffimminnut uteqqissinnaanngorsimapput.
Tasiilami najugaqartut 13-it nunap sisoornera pissutigalugu ataasinngormat najugaqarfimminnit qimagutinneqarsimasut, angerlarsimaffimminnut utertissimapput, Kalaallit Nunaanni Politiit ilisimatitsipput.
Najugaqartut nalunaarfigineqarsimapput, pingasunngornermi ullup-qeqqanut angerlarsimaffimminnut uteqqissinnaasut, pigaartut pisortaat Julie Senderovitz Bendtsen Sermitsiaq.AG-mut ilisimatitsivoq.
Upalungaarsimasut sumiiffimmi assaareernerisigut najugaqarfigisaq isumannaatsuusoq nalilerneqarsimavoq:
- Nuna sisoorsinnaasoq assaaffigineqareersoq, upalungaarsimasut pisortaata nalilersimavaa sisoortoqaqqinnavianngitsoq.
GEUS naliliinermut isumaqataasoq
- GEUS suleqatigalugu naliliisimapput, GEUS-imillu naliliineq isumaqatigineqarluni, Julie Senderovitz Bendtsen oqarpoq.
Ataasinngormat unnukkut nuna sisoorpoq najugaqartullu qimagutsinneqarlutik. Pingasunngormat ullaakkut politiit, upalungaarsimasut GEUSi.lu naliliipput, sisoortoqaqqissinnaammat najugaqartut allami suli najugaqartinneqarallassasut.
GEUS-imi ilisimasallit sisoorfiusimasumik satellitsikkut ikiorsiullugit upalungaarsimasunut politiinullu ikiuussimapput.