nunaqarfiit pillugit ataatsimeersuarneq
Tasiilami immuutaarupput
Nunaqarfinni isorliunerusunilu nioqqutissanik pilersuinerup pitsanngorsarnissaa nunaqarfiit pillugit Ilulissani isumasioqatigiittut oqallisigisaasa ilagaat
Tasiilami innuttaasut immuit panertut naammagiinnartariaqarpaat umiarsuup siulliup junip 18-ani tikinnissaata tungaanut. Immuit kimittuut kimikitsullu imerpalasut maajip aallartilaarnerani nungupput Islandimiillu nioqqutissanik pissarsiniarnissaq akisuallaassaaq.
Atuaruk: Ulluinnarni pisariaqartita nungulersut: Cola 200 kroneqartoq
Nunaqarfinni isorliunerusunilu ukiumut takisuumut peqqumaatit nungullataalerpu. Upernaviup avannaani Kullorsuarmi coca cola-taaruppallapput cola literip affaa 200 koruunilerlugu inuit akornanni nioqqutigineqartalersimalluni.
Maanna Tasiilami imerpalasunik immuutaarupput.
- Immuit imerpalasut risdrik aamma soyamælk pigigaluarpagut kisianni inuit tamakku soqutiginnginamikkit. Qujanartumik immunnik panertunik peqarluarpugut immunnik allaanerulaanik perusunngitsut pisiarilluartagaannik, Tasiilami Pilersuisup pisiniarfiani ningiuusoq Martha Mikaelsen Sermitsiaq.AG-mut oqarpoq.
Nunaqarfimmiit pajussapput
Kuummiuni suli imerpalasunik immuuteqarluarput aammalu kangerluk maanna sikoqaqisoq angallavissaaleriarmat immunnik Tasiilamut nuussisoqartussaalluni. Immuit nutaajunerusut umiarsuaq siulleq juunip 18-at tikippat aatsaat pisiassaalissapput.
Taama pisoqartarnera isorliunerusuni najugallit nalunngilluarpaat. Upernaakkut nioqqutissat ilaat nungullattaalersarput umiarsuup kingulliup juulli sioqqullugu tikittup pajugutai nungukkiartuleraangata
Nunaqarfiit pillugit Ilulissani tallimanngornermiit sapaat ilanngullugu isumasioqatigiittut oqaluuserisaasa tamanna aamma ilagaat.
Tamannattaaq sisamanngornermi Inatsisartuni oqaluuserineqarpoq. Atassut sinnerlugu Inatsisartuni ilaasortat Gerhardt Petersen aamma Knud Kristiansen apeqquteqaat tunngavigalugu oqallinnissamik siunnersuuteqartuupput nunaqarfinni isorliunerusunilu pilersuinerup patajaannerusumik ingerlanneqarnissaa siunertaralugu.