Tasiilami hangarissaq ataatsimiititaliap akueraa
Aningaasaqarnermut Akileraartarnermullu Ataatsimiititaliap ernumassuteqareerluni Tasiilami qulimiguulinnut hangarimik sanaartornissamut 29 mio. koruuninik aningaasaliissuteqarnissaq akueraa. Aningaasat nunatsinni sumiiffinnit arlalinnit mittarfiit pitsanngorsarneqarnissaannit nuunneqassapput.
Tasiilami qulimiguulinnut hangarimik sanaartornerup aallartinnissaanut Naalakkersuisut kontonit arlalinnit aningaasanik nuussinissartik kissaatigaat. Tamatuma Inatsisartut Aningaasaqarnermut Akileraartarnermut Ataatsimiititaliaa ernumatippaa, Naalakkersuisut apeqqutinik arlalinnik akissuteqarnerisa kingorna aatsaat aningaasaliissuteqarput.
Tasiilami hangarimut 29,3 millionit koruuninik aningaasaliisoqartussaavoq, Naalakkersuisullu Aningaasaqarnermut Akileraartarnermullu Ataatsimiititaliaq qinnuigaat suliaq erngertumik suliarineqassasoq, sanaartorneq piaarnerpaamik aallartinniassammat. Aalajangernerup kinguartinneqarnissaat ataatsimiititaliap aalajangiinerani atuarneqarsinnaavoq.
’Mittarfiit nutarsarneqarnissaannut’aningaasanit immikkoortinneqartunit, millionit kontonit arlalinnit nuunneqassasut, Naalakkersuisut siunnersuutigaat, ukunannga:
Tasiilaq, Ittoqqortoormiit, Qeqertarsuaq, Kangaatsiaq, Qasigiannguit, Narsaq, Narnortalik aamma Uummannaq.
Ataatsimiititaliaq: Suliniutit pingaaruteqarput
Tamatuma saniatigut Naalakkersuisut kontomit suliniutinut, Assartuussineq pillugu isumalioqatigiissitaasimasumut ilanngunneqarsimasut 16 millionit koruunit nuukkusuppaat.
Aningaasalerneqarnissaa ilaatigut Aningaasaqarnermut Akileraartarnermullu Ataatsimiititaliap ernumassuteqarfigaa, ataatsimiititaliallu aningaasaliissuteqarnissap akuerinnginnerani Naalakkersuisut akissuteqaqqaarnissaat piumasaraat:
- Aammattaaq ataatsimiititaliaq isumaqarpoq sanaartornermik suliniutit qulimiguulinnik eqqussisarfimmik nutaamik sanaartornermut aningaasanik aallerfiuniartutut taaneqartut pingaaruteqartuusut. Tamanna Kalaallit Nunaanni inuiaqatigiinnik tamanik naammaginartumik angallassinikkut kiffartuussinissaq eqqarsaatigalugu.
Taamaammat ataatsimiititaliap suliniutit taarsiullugu 2022-mi aningaasanut inatsimmut ilanngutissanersut paaseqqaarusuppaa.
Qulimiguulik annaassiniartartoq pisariaqartoq
Tasiilami hangari qulimiguulimmut, Air Greenlandip ilaatigut annaassiniarnermut atugassaanut atugassatut sananeqassaaq. Aningaasaqarnermut Akileraartarnermut Ataatsimiititaliap siornali allakkat saqqummiuppai, tassani qulimiguulinnut nutaanut hangarinik nutaanik sanaartortoqartariaqalerneranik Naalakkersuisut naatsorsuuteqartut atuarneqarsinnaalluni.
Tamatumunnga atatillugu ataatsimiititaliaq aamma Naalakkersuisunut apeqquteqarpoq, SAR-imut upalungaarsimanermut tunngasumik saniatigut aningaasaliissuteqartoqassamaarnersoq.
Ataatsimiititaliaq pingasunngormat sapaatip akunnerata siuliani Naalakkersuisunut apeqquteqarpoq, ataatsimiititaliarlu tallimanngormat ataatsimeeqqippoq. Aalajangiinermi naatsumik imaqarniliami allaqqavoq, ataatsimiititaliaq Naalakkersuisut akissutaannut hangarillu aningaasalerneqarnissaannut akuersisoq atuarneqarsinnaavoq.