Tunu
Tasiilami eqqakkanik paasisitsiniaaneq
Erinarsuut Qujanaq - aqqusinerni pinngortitamilu maangaannaq eqqaasannginnissamik namminersorlutik oqartussat paasisitsiniutaat - Tunumi atorneqarpoq
Julie Berthelsenip erinarsuut Qujanaq, nunatsinni tamarmi pinngortitamik illoqarfinnillu minguinnerusunik nalunaajaataasoq, ukioq manna erinarsoqqippaa.
Mala Høy Kúkop, pinngortitamut, avatangiisinut inatsiseqarnermullu Naalakkersuisup (A), sisamanngormat Tasiilami Alivarpimmi 7.x-imi atuartut peqatigalugit pinngortitap illoqarfiillu minguinnerunissaannut eqqaaviit atorneqartarnissaannik paasisitsiniaaneq nangippaa.
Pitsaanerulersimavoq
Paasisitsiniaaneq siorna politikerip Atassummeersup siulianit Kim Kielsenimit (S) aallartinneqarpoq, maannalu eqqaaviit atorneqartarnissaannik eqqaasinneqaqqissaagut.
– Malugisimavara amerlanerusut eqqaaviit atortalersimagaat, inuillu pinngortitamiissimagaangamik igatassatik katersortaraat. Tamanna pitsaasuuvoq, ineriartornerlu tamanna ingerlaannassaaq, Mala Høy Kúko oqarpoq.
Atuartut erinarsoqataapput
Tasiilami 7.x-imi atuartut peqataapput Julie Berthelsenillu erinarsornerani erinarsoqataapput, namminersorlutik oqartussanit tusagassiorfinnut nalunaarummi allassimavoq.
Pinngortitap saligaatsuunerunissaanik unammisitsinermi isumassarsiamut pitsaanerpaamut ukioq manna 10.000 koruunit akissarsiassaritinneqarput.