Tasiilami akerliussutsimik takutitsineq: Nuanniitsuinnarnik saqqummiunneqartarnerput unitsinneqarli

Tasiilami innuttaasut ullumi nalunaaqutaq 13 ingerlaaqatigiissapput, illoqarfiup illuinnaasiortumik nuanniitsuinnarnik saqqummiunneqartarnera qatsukkamikku. Taama KNR allappoq.

- Naqissuserneqaqattaarpugut ornissalluta tujorminartoq, ersinartoq. Taanna arlalinnit malugereerparput, Gert Ignatiussen, ingerlaaqatigiinnissamik suliniuteqartoq, KNR-imut oqarpoq.

Taanna erseqqissaalluni oqarpoq, ajornartorsiutit poortorniarsarineqanngitsut, isumaqarnerarlunili, tusagassiuutini innuttaasullu akornanni pissutsit saqqummiunneqartartut illuinnaasiortumik nuanniitsuinnaasartut.

- Maanimiut misigisimavugut soorlu orninneqarnissatsinnut ersinartuusugut. Isumannaallisakkamik ineqartillugit aatsaat maaniittoqarsinnaasoq, Gert Ignatiussen KNR-imut oqarpoq.

Gentofte Kommune sapaatip-akunnerisa marluk matuma siorna aalajangerpoq, atuartut illoqarfimmut ikinngutigisamut Tasiilamut tikeraartut inuinnarni ineqartinneqartarunnaassasut. Taama pisoqarpoq illoqarfiit taakkua marluk 5. klassini atuartunik ukiuni 30-ni tikeraartitseqatigiittarnerat ingerlanneqareersorlu; ajornartorsiuteqarfiunngitsumik.