Tasiilami ajornartoornermi aqutsineq pillugu sungiusartoqarpoq
Tunup illoqarfiani ajornartoornermi aqutsineq pillugu sapaatip akunnerani kingullermi workshoppertitsisoqarpoq.
Tasiilami oqartussaaffeqarfiit suliffeqarfiillu sapaatip akunnera kingulleq ajornartoornermi aqutsineq pillugu workshoppertitsinermut Kommuneqarfik Sermersooq ingerlatsisuuvoq.
Kommuni nittartakkamigut allappoq.
Ajornartoornermik isumaginnissinnaaneq
Ajutoornerit illoqarfimmut innuttaasunullu annertuumik kingunerlutsitsisut pakkersimaarnissaannut ullut pingasut ingerlanerini peqataasunit sungiusarneqarput, kiisalu immikkoortut suleqatigisartakkallu allat ilisimaarilersinneqarlutik.
- Ullut kingulliit marluk ingerlanerini ajutoornermi aqutsineq sungiusarneqarpoq. Pisut assigiinngitsut sungiusarneqarput taakkulu pillugit peqataasunit assigiinngitsunit iliuuseqarfigineqarlutillu suleqatigiissutigineqarput. Ilaatigut angallattuni ajutoorneq, imermik mingutsitsineq, eqqaavissuarmi ikuallattoorneq aamma akerliussutsimik takutitsinerit sammineqarput, kommunimit ilisimatitsissutigineqarpoq.
Savalimmiunik suleqateqarneq
Politiit, Kommuneqarfik Sermersooq, Nukissiorfiit, Mittarfeqarfiit aamma Annaassiniartartutut Upalungaarsimasut sungiusarnermut peqataapput.
Kalaallit Nunaanni Savalimmiunilu katillugit sisamariarluni workshoppertitsinissani Tasiilami workshoppertitsineq siulliuvoq. Workshoppi tulliani novembarimi Savalimmiuni Klaksvikkimi ingerlanneqassaaq. Workshoppertitsereernerit tamaasa suliniut pillugu suleqatigiissitaq naliliisassaaq misilittakkanillu tulliani workshoppertitsinissamut ilanngunneqartussanik katersilluni.
- Suliniut Københavns Professionshøjskolep (Katastrofe- og risikomanageritut ilinniarfik), Savalimmiuni Ilisimatusarfiup, Klaksvikimi Upalungaarsimasut kiisalu Kommuneqarfik Sermersuup akornanni suleqatigiissutaavoq. Suliniut Nordplusimit aningaasaliiffigineqartoq ilisimatitsissutigineqarpoq.