Tasiilameersoq Silvia Prinsesse Benedikte-mut tupaallatitsivoq
Tunumi meeqqat atuartut Gentofte aamma Tasiilaq illoqarfittut ikinngutigiinerannut atatillugu Prinsesse Benedikte sisamanngormat pulaarpaat. Pulaarnermi Silviap prinsesse Benedikte tupaallatsillugu qungujutsippaa.
Meeqqat 22-t Christian VIII’s Palæ-mi Amalienborg-imiittumi sisamanngormat pulaarput. Tasiilameersoq 11-inik ukiulik Silvia immikkut ittumik maluginiarneqarpoq. Taannami assimik nuannersumik prinsessemut takutitsisivoq. Billedbladet taama allaaserisaqarpoq.
Silvia assinik arlalinnik prinsesse Benedikte-mut takutitsivoq. Assit prinsesse Benediktep Kalaallit Nunaanut tikeraarnerani 2018-imi assilisaapput. Assimi Silvia kalaallisoorpoq prinsesselu issiaqatigalugu.
- Covid-19 ilungersunartorsiortitsereerluni paasisassarsiorlutik angalasut tunumeersut kiisami Christian VIII's palæ-mut, Amalienborgip illuasuaanut prinsesse Benedikte-miit ileqquusutut tikilluaqquneqarput, Royal Press Photo taama paasissutissiivoq nangillunilu:
- Atuartut pissanganerat takuneqarsinnaajuannaartoq annertuumik prinsessemut nuannaartitsivoq. Meeqqat akunneq ataaseq illussaarsuarmi pulaartinneqarput illussaarsuarlu qimappaat kunngikkormiunik selfie-qateqareerlutik.
Dronning Margrethe inuulluaqquserusukkaluartoq
Ileqqut malillugit prinsesse Benedikte-mut pulaarnermi prinsesse-p Ataqqinartorsuaq Dronning peqataasinnaannginnini ajuusaarutigisimagaa oqaatigaa.
- Prinsesse Benediktep ilaatigut oqaluttuaraa qatanngutini Dronningi ullumikkut pulaartoqarnerani peqataasinnaannginnami ajuusaartoq. Tunumullu aasaq angalanissaminut assut qilanaarsimagaluarluni aamma oqaatigisimallugu. Tunumullu tikeraarnissaq utaqqilaartariaqartoq paasissutissiissutigalugu. Royal Press Photo paasissutissiivoq.