Taseralik nutaamik pisortartaarpoq
Inger Eriksen Sisimiuni kulturip illorsuani Taseralimmi pisortanngorpoq
Sisimiuni kulturkikkut illorsuarmi siulersuisuni ilaasortat aalajangerpaat Inger Eriksen pisortanngussasoq.
Ukiuni aqqanilinni pisortaasimasoq Arnajaraq Støvlbæk taamaasilluni taarsertussanngorpaa.
- Inger Sisimiuneersuuvoq ukiorpassuarnilu kulturilerinerup iluani aaqqissuussani assigiinngitsuni aaqqissuusseqataasareerlunilu peqataasareerpoq. Kulturimut tunngatillugu aaqqissuisarnerni nunaqqataasut peqataatittarnissaanut misilittagaqartuuvoq. Taamatuttaaq suliffeqarfinni annerusuni aqutseqataasutut misilittagaqarluartuuvoq, qularutiginngilarpullu misilittakkani ikigisassaanngitsut Taseralimmi pisortatut sulinermini atorluarumaarai, Taseralimmi siulersuisuni siulittaasoq Jens Klaus Lennert oqarpoq.
Sisimiuni kulturikkut illorsuup pingaarnertut ilaatigut suliassarai Qeqqata kommuneani kulturilerinermik ineriartortitseqataanissaq taamatullu innuttaasunut sammisassaqartitsinerup annertusartuarnissaa innuttaasut qanimut suleqatigalugit.