Sisimiut
Taseralik aamma Katuaq mitaartunik unammisisitsilerpoq
Sisimiuni Nuummilu kulturikkut illorsuarni mitaallaqqinneqqusaatsitseqqilerput kunngit pingasut ulluanni - unammisitsinerit alutorineqarluartarput
Kulturikkut illorsuaq Taseralik Sisimiuniittoq ileqquliussimasani malillugu kunngit pingasut ulluanni - aqagu marlunngornermi januaarip arferngani mitaallaaqqinnequsaatsitsissavoq.
Ukiortaap kunngillu pingasut ullua nalaani mitaarluni ileqqulersortarneq, suli Sisimiuni aamma ingerlanneqartarpoq.
- Sisimiuni ukiorpassuarni kunngit pingasut ulluanni taamaallaat mitaarneq atorneqartarsimavoq, Taseraliup pisortaa Arnajaraq Støvlbæk tusagassiuutinut nalunaarummini taama allappoq.
Ukiormanna unammisitsinermi dommeriussapput Heidi Ramsøe, timersorluni peqatigiiffinni ingerlataqartut sinnerlugit, Birgitte Johansen, Qeqqata Kommunianit 2014-imi nersornaaserneqartut ilaat kiisalu isiginnaartitsisartoq isiginnaartitsissusiortartorlu Valerius Nielsen. Quiasaarillaqqeqisoq Otto-Mika Villumsen ilisarisitsisartuussaaq.
Mitaartunik unammisitsineq unnukkut arfineq marlunut aallartissaaq. Mitaarlutik unammeqataaniartut arfineq marlup qeqqanut takkutereersimanissaat kissaatigineqartoq Arnajaraq Støvlbæk Taseralik sinnerlugu taama allappoq.
Katuami aamma mitaallaqqinneqqusaatitsisoqassaaq
Nuummi kulturikkut illorsuarmi Katuami aamma mitaallaqqinnerpaanik unammisitsissaaq kunngit pingasuni. Mitaallaqqinnerpaat pingasut toqqarneqassapput, unammisitsinerlu nalunaaqutaq 15.00-mit 16.30-ip tungaanut ingerlanneqassaaq.