Tartupaluup akerleriissutaanera unitsinneqalersoq
Tartupalummi, qallunaatut Hans Ø-mik ateqartinneqartumi, erfalasoq sorleq amuneqarsimassanersoq ukiuni arlalissuarni akerleriissutaareersorlu, isumaqatigiittoqalinnguatsiarpoq.
Múte B. Egede Canadamut sapaatip akunnerata tulliani angalassaaq. Sermitsiaq.AG-llu paasissutissaatai naapertorlugit Naalakkersuisut siulittaasuat nunatta Canadallu akornanni immap killigititassaanut tunngatillugu isumaqatigiissummik 14. juni atsioqataassaaq.
Suleqatigiissitaq 2018-imi pilersinneqarpoq, immap killissaanik aaqqiagiinngittoqarnera pillugu aaqqiissutissamik ujartuisussamik. Aaqqiagiinngissutigineqartoq sorsuakkiarineqanngikkaluartoq, nunatta Canadallu akornanni qeqertami nunap sorliup erfalasua amuneqarsimassanersoq akerleriissutigineqarsimavoq.
Aaqqiagiinngissummi nunat akerleriit ikinngutinnersumik imminnut pisarsimapput. Tassami qallunaat illersornissaqarfiata Canadap erfalasua peeriarlugu erfalasortik amugaangamikkut, Canadap sakkutuui snapsimik qimatsivigisarsimavaat, soorlu aamma canadamiut sakkutuuisa dannebrog peeriarlugu Canadap erfalasua amugaangamikku danskit sakkutuui whiskymik qimatsivigalugit tunisarsimagaat.
Vivian Motzfeldt taamani ilaavoq
Suleqatigiissitaq pilersinneqarmat maannakkutulli Vivian Motzfeldt (S), nunanut allanut tunngasunut naalakkersuisuuvoq. Aaqqiagiinngissutip aaqqinneqarnissaa taassuma taamani oqaatigaa.
- Nunap imartallu killiginut tunngatillugu aaqqiagiinngittoqarnerani Canadap Kalaallit Nunaatalu torersumik aaqqiiniarlutik iliuuseqarnerat ilorrisimaarutigilluinnarpara. Tartupaluk / Hans Ø-mut apeqqut ukiuni arlaqalersuni oqaluuserineqareerpoq. Qularinngilara suliaq eqqissisimasumik aaqqiissuteqarnissamillu siunertaqartumik ingerlanneqassasoq, Vivian Motzfeldt 2018-mi oqarpoq.
Qeqertap oqaluttuassartaa
Ukiut sisamat qaangiuttullu Vivian Motzfeldt naalakkersuisut sinneri peqatigalugit qeqertamut tunngatillugu aaqqiagiinnginneq iluarsiiviginiartussanngorpasippaat.
Tartupaluk qeqertaavoq naggorinngitsoq inoqanngitsorlu. Canadap Kalaallit Nunaatalu akornanni imartamiippoq. Qeqertap nunarsuarmi inissisimalluarnera, nunallu iluani pisuussutinik, soorlu oliami, gas-imik aatsitassanillu peqarsinnaanera pissutigalugu nunat marluk killeqarfimminnut ilanngukkumavaat. Imartap killiganut tunngatillugu aaqqiagiinngissut 1973-imili aallartippoq.
Qeqertaq paasisassarsiorluni angalasumit C. F. Hallimit 1871-imi nassaarineqarpoq. Paasisassarsiorluni angalanermi peqataasoq, inunnik naggueqartoq Hans Hendrik Qeqertarsuatsiaaneersoq qeqertamut atsiunneqarsimavoq. Taanna Qalasersuaq Avannarlermut paasisassarsiornerni arlalinni peqataasarsimavoq.
