Skip to main content

Tarrap musikvideoliaa 26.000-eriarluni takuneqareerpoq

Kalaaleq rappertartoq nuannarineqarluartumik immiusseqqissimavoq. Musikvideoliaa "Qimiinnarl' " nittartakkani attaveqatigiiffiusuni 26.000-eriarluni tusarnaarneqareersimavoq 500-niillu siammarneqarsimalluni.

Musikvideo ”Qimiinnarl’ ”, rappertartup albumiliaani “Josef Tarrak”-mi taaguuserneqarsimasumi erinarsukkat tusarnaarneqarsinnaasut ilagaat. Musikvideo juunip 21-ani saqqummersinneqaramili maannamut 25.931-riarluni isiginnaarneqareersimavoq. Facebookimik atuisut 1.100-t sinneqartut musikvideomut qisuariarsimapput, immiussarlu 500-riarlugu siammarterneqarsimalerluni.

- Ulluinnarsiutigaarput takullugit imertut, inuusuttut toqunissaminnut qinertut. Qilattut qilaanut, imertut nipaanut. Nipangertut, Josef Tarrak-Petrussen musikvideomi taama aallartippoq.

Musikvideomi saqqummiunneqartut ilaat tassaavoq inuiaqatigiinni ajornartorsiutit. Innuttaasut imigassamik ikiaroornartumillu atornerluisoqarneranik nipagiussiinnarput.

- Uannut pingaarnerpaavoq nunatsinni ullumikkut pissutsit piviusut takutinnissaat. Aammali uannut pingaaruteqarpoq meeqqat taamatut misigisaqartut takutinnissaat kisimiinngitsut, Josef Tarrak-Petrussen Sermitsiaq.AG-mut oqaluttuarpoq.

Josef Tarrak-Petrussen unneqqarilluni oqaluttuarpoq meeraanermini assigusunik misigisaqarsimalluni. Ilanngullugulu oqaluttuaralugu ilisarisimasaqarluni imminut toqussimasunik aammalu imminut toqunnissamik eqqarsaateqartunik.

- Meeraagallarama rappertartut, Maasi Pedersenikkutut ittut, imigassamik ajornartorsiuteqartoqarneranik sumiginnaanermillu rappertut tusarnaartarnikuuakka. Tusarnaarneranni paasivara kisimiinnanga, allat uattulli misigisaqartut. Misigissuseq taanna meeqqanut ullutsinni taama misigisaqartunut ingerlateqqikkusuppara, oqarpoq.

Imminut toqunnermik kinguneqarsinnaavoq

Taallami oqariartuutit ilagaat oqartussaasut ajornartorsiutaasunik takunnikkusunngippata, taava inuiaqatigiit nungukkiartulissasut. Ajornartorsiutillu aaqqiissutissarsiorneqanngippata qimaaffissat assigiinngitsuupput, rappertartoq musikvideomi rapperpoq.

- Nunami maani angiinnarl’, nunami maani imiinnarl’, nunami maani nivinngarl’, nunami maani qimiinnarl’, Josef Tarrak-Petrussen taama rappertoq tusaaneqarsinnaavoq.

Josef Tarrak-Petrussenip albumiliaa kingulleq “Josef Tarrak” iTunes-imi aamma Spotify-mi pisiarineqarsinnaavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER