Tarrak nutaamik saqqummersitsilerpoq

Josef Tarrak-Petrussen albummimik nutaamik saqqummersitsippat, Tarrammik nuannarinnittut nutaarluinnarmik tusagassaqalissapput. Qaquguli saqqummissanersoq rappertartup oqaatigerusunngilaa. Tupaallatsitsissaanga, oqarpoq,

Rappertartoq, ilaatigut musikvideomik aalassatsitsisumik, Tupilak-mik, suliaqarnerminit tusaamaneqartoq, albummimik nutaamik saqqummersitsilerpoq. Saqqummersitassaa nutaaq ateqarpoq ‘Josef Tarrak’.

Rappertartoq kalaaleq ilisimatitsivoq albummi nutaaq saqqummertumit siullermit – ukiut pingasungajaat matuma siorna saqqummersimasumit – allaanerungaassasoq.

- Allaanerujussuuvoq. Nipit allaanerupput, albummimiit siullermiit allaaneruvoq. Rappertartutut ukiuni kingullerni ineriartupiloornikuvunga, albummimilu nutaami tamanna tusaaneqarsinnaassaaq, Josef Tarrak-Petrussen Sermitsiaq.AG-mut oqarpoq.

Albummi qaqugu saqqummissanersoq oqaatiginianngikkallarpaa. Pisiassaalerpalli avammut nalunaarutigineqassaaq.

Rapperluni nipilersuut ataasitut ittoq

Albummi saqqummersussaq 18-inik erinarsugartaqarpoq 44 minutsinillu sivisussuseqarluni. Josef Tarrak-Petrussen ilisimatitsivoq erinarsuutit atorneqartut imminnut ataannartutut nipeqassasut, albummi ataannartumik tusarnaarneqarsinnaassalluni, nikinneri malunnassanatik.

Taassuma saniatigut Uummannami meeqqat illuanni meeqqat erinarsoqatigisimavai.

- Ukiut marluk matuma siorna naapeqqaarpakka, ingerlaannarlu atassuteqarluarpugut. Neriorsorpakka taamaallunga suleqatigissallugit, nipilersuutillu maanna suliarisimasakka tulluarluinnarmata immiusseqatigaakka, meeqqat angerlarsimaffiani najugaqartut naapinneri pillugit oqaluttuarpoq.

Albummi nutaaq atorlugu nuannarinnittut Josef Tarrak-Petrussenip kinaaneranik ilikkarnerusinnaanertik qilanaarisinnaavaat. Josefimi perornerusimasoq rappernerani tusaaneqarsinnaajumaarpoq.

- Albummi uannik imaqarneruvoq. Immiussat suliarinerisa nalaanni inuttut rappertartutullu ineriartornikuuvunga, albumminni taakku tusaaneqarsinnaajumaarput, tamanna qilanaartuutigisinnaavara, naggasiivoq.

Powered by Labrador CMS