Tarnip pissusaanik immikkut ilisimasalik: Ikiuutit atorneqanngippallaaqaat
Tarnip pissusaanik immikkut ilisimasalik Else Poulsen, Qaqortumi GUX-S-imut attuumassuteqartoq, isumaqarpoq naqinnernik ilisarinnissinnaanngitsunut ikiuuteqarluartoq. Misilitsinnissaq tunngaviliisariaqanngilaq, ikiuutilli tulluarsarnissaanut atorneqarsinnaalluni.
Naqinnernik ilisarinnissinnaannginnermut misiliut tunngaviliisuusariaqanngilaq allanniarnermi atuarniarnermilu ajornartorsiuteqartup, atuarnermini ilinniarnerminiluunniit ikiuutinik pinissaanut.
Tarnip pissusaanik immikkut ilisimasalik Else Poulsen, Qaqortumi GUX-S-imi ilinniartunut siunnersuisarlunilu aqqutissiuussisartoq oqarpoq. Inuit innarluuteqartut imaluunniit takuneqarsinnaanngitsumik nappaateqartut, ilinniakkamillu nalinginnaasumik naammassinninnissamut unammillernartitsisut, GUX-S-imi tulluarsakkamik ilinniartinneqartarput.
- Naqinnernik ilisarinnissinnaanngitsut piareersarnissaannut ilinniarfimmit piffissamik sivisunerusumik tunineqarsinnaapput. Kalaallisut oqaatsigut assersuutigalugu qallunaatut oqaatsinit takinerujussuusarput, taamaattumillu piareersarnissamut piffissartornarnerusariaqarlutik, Else Poulsen nassuiaavoq nangillunilu:
- Unammillernartoq uaniippoq, ikiuutit atorneqanngippallaarnerat.
Taanna ilinniartunit qulit missaannit, atuarnermik allanniarnermillu ajornartorsiuteqartunit, ukiut tamaasa saaffigineqartarpoq. Ilisimatitsivoq GUX-S-imi atuartut atuagarsornikkut ingerlalluartut, ikiuutit atorneqarsinnaasut atuarfimmi atorneqarmata.
Misilitsinneq ikiuutit tulluarsarniarlugit
Ilinniarfittut ikiuunniarluni qanoq iliortoqangaatsiarsinnaareerpoq. Else Poulsenili isumaqarpoq Kalaallit Nunaanni naqinnernik ilisarinnissinnaanngitsuunermut misiliuteqartoqartariaqartoq, paasineqarsinnaaniassammat innarluut qanoq sakkortutigisumik atorneqarnersoq.
- Tassanngaanniit ikiuutit tulluarsarneqarsinnaapput, paasiniarneqarsinnaallunilu naqinnernik ilisarinnissinnaanngitsuuneq qanoq pinngorsimanersoq. Soorlu inunnguutaanersoq, ilaqutariissutitut kingornutaanersoq allatigulluunniit niaqqup ajoquserneratigut pinngorsimanersoq. Taakku aallaavigalugit ikiuutissat inummut tulluarsarneqarsinnaapput, tarnip pissusaanik immikkut ilisimasalik nassuiaavoq.
Unammilligassaqarluarpoq
Naqinnernik ilisarinnissinnaanngitsuunermut aarlerinartumik inissisimasut misissortalernissaannut suliaq ukioq manna naammassisasoq, paragraf 37 atorlugu akissummi 2018-imi ilisimatitsissutigineqarpoq.
- Misilitsissinnaanngikkaanni ikiuutinillu pisinnaanngikkaanni, inuk naqinnernik ilisarinnissinnaanngitoq ilinniarnermik naammassinninnissamut unammillerneqartorujussuussaaq. Ikiuuteqartariaqarpoq, Else Poulsen oqarpoq.
