Tarnip pissusaanik ilisimasalik: Innimiilliorfigineqarneq timikkut kingunerlutsitsisinnaavoq

Nikanarsagaalluni tiingaffigitissimanerit pillugit allakkani ataaseq maluginiagassaavoq, tassalu qanoq iliuuseqarsinnaanngitsutut misigisimasarneq qerisoornerluunniit. Tamanna tamatigut pineq ajorpoq, taamatulli qisuariartoqartarnera nalinginnaalluinnarpoq.

Tarnip pissusaanik ilisimasalik Naja Lyberth nassuiaavoq, kinugaassiuutitigut nikanarsagaanermi imaluunniit innarlerneqarnermi assigiinngitsupilussuarmik qisuariartoqartartoq.

- Kinguaassiuutitigut nikanarsarneqaraanni, tamannalu ilimaginngisamik pigaangat tuparujussuartoqarsinnaavoq imaluunniit qamuuna ilukkut nuanniitsumik misigisaqartoqarsinnaavoq arlaatigut ilioriarsinnaajunnaartitsisumik. Kinguaassiuutitigut nikanarsarneqarnermi misigissutsit assigiinngitsupilussuit atorneqarsinnaapput, soorlu kamaqalerneq, akeqqersimaarneq, soriarsinnaannginneq ikioriarfeqannginnerlu. Ilimaginngisamik taamatut pisoqartillugu akunnattuungalerlunilu iliuusissaaleqisoqarlersinnaavoq – susoqartoruna??? Naja oqaluttuarpoq.

- Iliuuserineqartoq kissaatigineqanngitsutut nuanniittutullu misinnarsinnaavoq, pisup pinerani oqaasinngortitsinissaq nalornissutigineqarsinnaalluni aamma qisuarianngitsoorfigineqarsinnaalluni. Pingaartumik nikassaasoq pissaaneqaraangat, assersuutigalugu nikassaasoq sulisitsisuuppat oqartussaasuuppalluunniit.

Imminut illersorniarneq

- Kinguaassiuutitigut innarlerneqarnermi annilaangangaanni timikkullu malugisinnaallugu qimaasinnaanani akersuussinnaananiluunniit, timip ajornartoornermini illersuutaa ikittarpoq: qerisoorneq. Tamanna pisarpoq timitsigut malugingaangatsigu innarliisoq timikkut eqqarsartaatsikkullu imminerminit nukittunerujussuusoq.

- Tassa qanoq ilioriarsinnaajunnaartarneq nammineq aalajangersinnaanngilarpoq. Akersuussinnaanngikkaanni qimaasinnaananilu timi imminut illersorniarluni ”qerisarpoq”. Tamana kinguaassiuutitigut innarlerneqarnermi amerlasuutigut pisarpoq.

Naja Lyberthip nassuiarpaa, timikkut 'qerisooraanni' innarlerneqarneq timikkut tarnikkullu annernarpallaarneq ajortoq.

Kingunerlutsitsisinnaaneq

Ajornartorsiutaasorli tassaavoq, taamatut innarlerneqarsimgaanni timikkut kingusinnerusukkut kingunerlutsitsisoqalersinnaanera, timimi 'qimaarusullunilu akersuukkusukkaluartarmat' taamaaliorusunnerlu qerisoorsimalluni.

- Imminut annanniarluni qimaarusunneq akersuukkusunnerlu timimut qaratsamullu arlaatigut tuttarpoq, suliarineqanngikkuni ukiorpassuarni timikkut malugineqarsinnaasumik. Sianiutitigut kingunerlutsitsinermi, assigiinnarpaa sikkilip assakaasuanut qisumineq ikkukkaanni ”nalinginnaasumik ingerlasoqarsinnaajunnaartarnera”. Timi eqqarsartaaserlu imminnut atassuteqarunnaartarput, timimi annakkusunneq.

Nammineerluni innarlerneqarsimasoq

Naja Lyberthip kinguaassiuutitigut aamma nammineerluni innarlerneqarsimagami tupannartua iliuseqarsinnaannginnerlu ilisimalluarpai. 1980-ikkunni illoqarfik qaninnerpaaq qimangaatsiarlugu sisoraatinik ujakkaariarsimavoq.

- Aqqutaani kommunimi politikkeriusimasoq, ilaatigut suliniuteqarneranik ikiorsimasara toqukkut manna qimagutereernikoq naapippara. Suliniut pillugu oqaloqatigiippugut. Sisorartartut illuaraannut apuuppugut, ilua qanoq isikkoqarnersoq aamma kissassilaarniarlunga iserpunga. Malillunga iserpoq. Ilimaginngilluinnakkannik iviangera talerperleq nuloralu talerperleq attuualeriasaarpai. Taamaalimmat oqariarsinnaajunnaarpunga, qujanartumillu qimallugu illuaqqamit anipallappunga, Naja Lyberth oqaluttuarpoq.

- Kingusinnerusukkut illoqarfimmi takugaangakku isigisinnaanngingajaavittarpara, sulimi kamaateqingakku. Kingunerlutsitsisarnermut tunngatillugu ilinniagaqarninni paasivara, qimaasinnaasimanera ajungitsuusoq – oqartussaasuuvoq timikkullu uanninngaanniit nukittunerujussuulluni, sulili kamassaqarfigisarpara manna tikillugu iluarsiiffigisimanngisannik. Kamassaqarneq ikusinga talerperleq atorlugu timaatigut ajallugu taamaalionerminillu untsitseqqullugu oqarfigisimannginnakku iluarsisimanngisara.

- Ukiut ingerlanerini stressileraangama timera equsarpoq, iliuuseqanngitsoorsimanerami timimma talerpiata tungaani suli atuummat. Kingunerluutimma suliarinerani timinnut tunngatillugu nammineq oqartussaanera, tassa innarliisoq oqartussaanngitsuusoq, misigeqqittalerlugu aamma innarleqqinneqassangaluaruma imminnut illersorsinnaallungalu oqarsinnaallunga nalujunnaarlungu nuannersuuvoq.

Kinguaassiuutitigut nikanarsarneqarsimagaanni innarlerneqarsimagaanniluunniit, Tusaannga oqarasuaat 801180 atorlugu saaffiginnittoqarsinaavoq.