Tarnikkut nappaatillit unnuisarfimmi ajornartorsiortartut: Kommuni inatsimmik malinninngilaq
Kommuneqarfik Sermersuumi oqartussaqarfimmi pisortap nassuerutigaa, innuttaasut tarnikkut nappaatillit najugaqarfinni illersugaasuni inissaqartinneqanngitsut. Tamanna inatsimmut akerliuvoq.
Innuttaasut arlallit tarnikkut nappaateqartut angerlarsimaffeqanngitsuupput Nuummilu unnuisarfimmi sinittarlutik, tamannalu - Frelsens Hærimi kopslederi Nathanael Münch naapertorlugu - akulikitsumik aaqqiagiinngissitsilersarpoq. Tamatumunnga ilaatigut kommunip inatsimmik malinninnginnera pissutaavoq.
Cecilie Schierbeckip, Kommuneqarfik Sermersuumi Suliffeqarnermut Isumaginninnermullu Ingerlatsivimmi oqartussatut pisortap erseqqissaassutigaa, najugaqarfiit najugaqaqatigiiffiillu neqeroorutaasut. Kommuni pinngitsaaliinissamut periarfissaqanngilaq aama innuttaasut pissarsiariuminaatsittarpai. Soorlu assersuutigalugu ataatsimeeqatigiinnissamut takkutinngittoortarnerat isummaminnilluunniit allannguisimanerat pissutigalugu.
Sermitsiaq.AG-mulli nassuerutigaa, kommunip najuagaqatigiiffiutaanni najugaqarfiutaannilu illersugaasuni inissaqalernissamut utaqqinartartoq.
Tamanna piviusuuvoq, - Inatsisartulli inatsisaat 2019-imeersoq - naapertorlugu taamaattussaanngikkaluarpoq. Tassanimi allassimavoq, kommunalbestyrelsip najugaqaqatigiiffinni aamma najugaqarfinni illersugaasuni inissat pisariaqartinneqartut naammattut pigineqarnissaat isumagisussaagai.
- Sullitanut assigiinngitsunut inissaqartitsinissamut amerlanerusunik neqerooruteqartarnissaq sulissutiginiarsarivarput, naammatumillu suliaqarniarneq unammillernartupilussuuvoq.
- Inatsisilioraanni, kommunip aaqqiissuteqarnissamut periarfissaqarnissaa aamma qulakkeerneqartariaqarpoq, Cecilie Schierbeck oqarpoq.
Innuttaasut ajornartorsiulersartut
Taassuma nassuiaatigaa, inatsisiliorneq iliuusaasoq. Inatsilli naapertorlugu suliniartarneq allaasoq.
- Matumani aamma pineqarput: Sumi najugaqartinneqassappat? Illu najugaqarfiusussaq pitsaasunik atugassaqartitsiva? Qanoq sulisoqartinneqassava?
Oqartussaqarfimmi pisortap nassuiaatigaa, suliffissaaleqisoqarpianngitsoq, tamatumalu malitsigisaanik sulisussarsiniartarneq ajornartupilussuusartoq.
- Tamanna sutigut tamatigut takuneqarsinnaasarpoq - aamma ilungersunartunik suliassaqartoqartillugu oqartussat tamarmik periarfissagissaaginnartanngillat. Isumaqarpunga innuttaasunik pineqartunik sullissiniartarnermi kikkut tamarmik sapinngisaminnik iliuuseqarniartaraluartut, kisianni kommuni, politiit, Namminersorlutik Oqartussat - peqqinnissaqarfilluunniit - amigaaterpassuaqarmata tamanna ilungersunarluinnarlunilu oqimaattuusoq.
Cecilie Schierbeckip tassunga atatillugu pivai sulisussaaleqineq inissaqartitsisannginnerlu.
- Inoqarpoq sulisussaaleqinerup inissaqartitsinnginnerullu malitsigisaanik ajornartorsiulersartunik. Innuttaasunillu oqaloqatiginninniartarneq ajornakusoortooreerpoq. Ilaat allanit oqaloqatigiuminarnerusarput, ilarpassuaqarpulli tarnikkut nappaateqarsorinnginnertik pissutigalugu neqeroorutinut akuersaarusunneq ajortunik. Taakku neqeroorutaapput. Inuillu pinngitsaalisinnaanngilagut, oqartussaqarfimmi pisortaq oqarpoq.
Kommuneqarfik Sermersuumit ilisimatitsissutigineqarpoq, kommuni katillugit 70-inut inissalinnik arfineq-pingasunik inaateqartoq aamma 13-inut inissalimmik tallimanik najugaqaqatigiiffiuteqartoq.
Kommunimi maannakkorpiaq innuttaasut tarnikkut nappaatillit 21-t inissaqartinneqalernissaminnut utaqqisuupput.