Tarnikkut ikiorneqarsinnaaneq pillugu GUX-imi ilinniartut innersuussuteqarput
Naak GUX Nuummi ilinniartut amerlanerpaartaat ikiorneqarnissamik pisariaqartitsinerminni siunnersorneqarluartutut misigisaraluarlutik, taamaattoq tarnikkut ikiorneqarnissamut periarfissat pitsaanerulersinniarlugit innersuussuteqarput.
MIO oktoberimi 2018-imi GUX Nuummi ilinniartunut isummanik paasiniaallutik apeqqutinik suliaqarsimapput, ilinniartullu 67-it peqataasimallutik. Isummanik paasiniaalluni apeqqutit GUX Nuummi ilinniarnertuunngorniartunit marlunnit suleqataaffigineqarlutik suliarineqarput.
Misissuinerup takutippaa inuusuttut amerlanerpaartaat – 94 procentit – aliasukkaangamik oqaloqatissaqarlutik misigisimasarput. Kisitsisilli takutippaat ilinniarnertuunngorniartut 37 procentiisa kissaatigaat inuusuttut tarnikkut ikiorneqarnissamik pisariaqartitsisunik ujartuisunik sulisoqartalissasoq.
GUX Nuummi ilinniarnertuunngorniartut tarnikkut ikiorneqartarnerup pitsaanerulernissaanut assigiinngitsunik innersuussuteqarput.
Innersuussutit ukuupput:
- Inuusuttuaqqat qanoq innersut pillugit inersimasut apersornerussapput
- Qaammatikkaartumik inuusuttuaqqat oqaloqatigineqartarlutik, qanoq inneri pillugit
- Ilinniartut nipaannerit eqqumaffigalugit
- Attaveqatigiinneq ammanerusoq – paquminarsaaneq annikinnerusoq
- Inersimasut tusarnaarnerussapput
- Inuusuttuaraq atuanngikulappat atuarfik ingerlaannaq attaveqartassaaq
- Inuusuttuaqqat naligaluigt saaffigineqartassapput
Ilungersunartutut tiguneqartariaqarpoq
Inuusuttut ajornartorsiutaat ilungersunartutut tiguneqartariaqartut pillugit meeqqat illersuisuat tusagassiutinut nalunaaruteqarluni oqariartuuteqarpoq.
- Pissutsit tamakku ilungersunartumik tigusariaqarpagut. Inuusuttut arlallit ilungersunartunik ajornartorsiuteqarput tarnikkullu ikeqarlutik, tamakkulu anigornissaannut ikiorneqarnissaq
pisariaqartippaat. Qulakkiissavarput, inuusuttut tamarmik tusaaneqartutut ikiorneqartutullu misigissasut, Aviâja Egede Lynge allappoq.
MIO-p ilaatigut nalilerpaa:
- Paquminarsaaneq ajornartorsiutinik qaangiiniarnermut ajornarnerulersitsivoq
- Ujartuisunik ikiuisoqarnissaa pisariaqarpoq
- Inuusuttuaqqat ikiortissarsiortillutik itigarneq misigisarpaat
- Inuusuttuaqqat tusarnaartussaminnik amigaateqarput
- Ikiuineq ersarissuussaaq periarfissaassallunilu
- Tarnip pissusaanik ilisimasalimmit ikiorneqarneq pisariaqarpoq
- Inuusuttuaqqat ajornartorsiutaat imaannaanngitsuupput, soorlu imminut toqunnissamik eqqarsaateqarneq aamma angerlarsimaffimmi persuttaasoqartarneq
MIO-p nalunaarusiaani tarnikkut ikiorserneqarnerit taaneqartut ilaatigut tassaapput ilinniarnertuunngorniarfimmi siunnersorneqarneq, tarnip pissusaanik ilisimasalimmik oqaloqateqarneq aamma ilaquttanik ikinngutinilluunniit oqaloqateqarneq.