Pinngortitaleriffiup umiarsuaataa ilisimatusarfiusoq aalisariutaasorlu Tarajoq, sapaatip-akunnerani kingullermi Ocean Explererip ikkarlinnerani ikiuisuuvoq, taanna ikkannersami Tunup Avannaani ingerlariaqqissinnaajunnaarpoq.

Tarajup ikiuneranut atatillugu isumaqatigiissutigineqartoq pillugu Pinngortitaleriffik maanna saqqummiussaqarpoq – akia ilanngullugu:

- Suliassap 3,8 million koruuninik nalilerneqartup Tarajoq-ip ulluinnarni aningaasartuutigisai aammalu suliaqarnermini ajoqusersinnaanerminut sillimmateqarnissaa matusussaavai, Pinngortitaleriffik tusagassiuutinut nalunaarummi allappoq.

Aviisini innuttaasullu attaveqaataanni Pinngortitaleriffiup umiarsuaatileqatigiiffiullu ’Ocean Explorer’-imik piginnittup SunStone Maritime Groupip akunnerminni isumaqatigiissutaat eqqoriaaffigisarlugu soqutigineqartorujussuusimammat, Pinngortitaleriffiup saqqummiussinerminut tunngavilersuutigaa.

Sillimmasiisarfinnit akuerineqartoq

Pinngortitaleriffiup SunStone Maritime Groupillu akunnerminni isumaqatigiissutaanni Pinngortitaleriffiup aningaasartuutaanut Tarajoq-llu sillimmasernissaanut tunnganerusimapput, suliassamut aningaasartuutaasut ajoqusiisoqassagaluarpallu sillimassutaasussat matussuserneqarnissaat pineqarnerusimallutik:

- SunStone Maritim Groupimik isumaqatigiissut Pinngortitaleriffiup umiarsuaatileqatigiiffianit Tarajoq-milu inuttanik suleqatigiinnikkut suliarineqarpoq. Imarsiornermut tunngasunik eqqartuussissuserisup misilittagaqarluartup isumaqatigiissutip inatsisit malillugit ingerlanneqarneranik qulakkeerinnittuuvoq (isumaqatigiissutaasut 1959meersut naapertorlugit) umiarsuarmik nikissinnaanngitsumik kaanngartitsillunilu kalinnermut tunngasoq naapertorlugu isumaqatigiissut suliarineqarluni. Pinngortitaleriffiup sillimassiisarfii isumaqatigiissummik aamma akuersiteqqaarlugit suliaq ingerlanneqarsimavoq.