‘Taqqissuuserisut’ meeqqanik inuunerinnerulersitsiniarput

Isumasioqatigiinneq, piumassutsimik sulisunit 50-init illoqarfinnit qulineersunit peqataaffigineqartoq, Meeqqaat Inuunerissut ukiuni pingasuni suliniutaanni ‘Kuseriarnerup Siaruarneratut’ ingerlatat kingullersaraat, meeqqat pisinnaatitaaffiisa inersimasunit ilisimaneqarnerulernissaat, kiisalu meeqqanik inuusuttunillu piumassutsimik sullissinissamut kaammattuinissaq siunertarineqarluni.

- Ukiut kingulliit pingasut illoqarfiit qulit tikeraarpavut, Kalaallit Nunaannilu meeqqat pitsaanerusumik atugaqalersinniarlugit inutsialappassuit iliuuseqarusulluinnartut amerlaqisut naapissimallutigit. Taqqissuuserisut najukkaminni inuiaqatigiinni eqqortumik iliuuseqarnissamut amerlanerusunik sakkussaqalersinnissaat isumasioqatigiinnermi siunertarivarput, Meeqqat Inuunerissut siulittaasuat Katrine Hjelholt Nathanielsen taama oqaluttuarpoq.

Atuaruk: Meeqqat inuunerissut aningaasanik tunissutisipput

- Ukiut assorsuaq pissanganartuusimapput – assut unammilligassaqarnarlutik peqatigisaanillu assut isumassarsinarfiullutik. Meeqqat atugaat pillugit sullissineq ilaanneeriarluni suliassarujussuartut isinarsinnaasarpoq, ineriartornerlu kigaappallaartutut misiginarsinnaasarluni.

- Taqqissuuserisulli issiaqatigitillugit, meeqqanik sullissinissamut isumassarsiaat takorluugaallu tusarnaaraanni, tamanna nuannaarnermik isumallualernermillu kinguneqaannartarpoq. Innuttaasut nukittuut tunniusimasullu amerlaqisut akornatsinniipput, Katrine Hjelholt Nathanielsen oqaluttuarpoq.

Suliniutip ‘Kuseriarnerup siuaruarneratut’ illoqarfiit Aasiaat, Paamiut, Tasiilaq, Uummannaq, Qaqortoq, Narsaq, Tasiilaq, Sisimiut, Maniitsoq aamma Nuuk tikeraarsimavai.

Suliniummit ‘Kuseriarnerup Siaruarneratut’ misilittagarilikkat Meeqqat Inuunerissut suliniummi nutaami aggersumi atoqqissavaat.