Iluaqutit
Tappiitsut qarasaasiakkut atuffassissummit ikiorneqarsinnaalerput
Qarasaasiakkut atuffassissut iluaqutigalugu kalaallit isigiarsuttut, naqinnernik ilisarsisinnaanngitsut atuarniarnikkullu ajornartorsiuteqartut kalaallisut allakkanik atuffanneqarsinnaalerput
Nunarput marlunngornermi qarasaasiakkut atuffassissummik siullerpaamik peqalerpoq.
Taama Synscenter Refsnæs, qarasaasiakkut atuffassissummik, maannalu ‘Martha’-mik taagukkaminnik ineriartortitsisimasoq, tusagassiuutinut nalunaaruteqarpoq.
Synscenter Refsnæsimit nalunaarutigineqartut naapertorlugu maanna isigiarsuttut, naqinnernik ilisarsisinnaanngitsut atuarniarnikkullu ajornartorsiuteqartut kalaallisut allakkanik atuffanneqarsinnaalerput, maannami Microsoft Word aamma Apple Safari atorlugit allaaserisat kalaallisut nipinngortinneqarsinnaalersimapput, soorlu aamma skærmimut atuffatit, programmit allisitsiutit kiisalu naqinnernik ilisarsisinnaanngitsunut atortorissaarutit atorneqarsinnaalersimasut.
Qarasaasiakkut nipip Marthap ineriartortinnerata saniatigut Synscenter Refsnæsip aamma ilaatigut qarasaasiakkut allanngortitsissut nersornaaserneqarsimasoq Robobraillemik taaneqartoq kalaallisuunngortissimavaa.
RoboBraille atorlugu atuartitsissutit assersuutigalugu tappiitsut allattaasaannut, atuakkanut nipitalinnut qarasaasiakkullu naqitanut nipinngortitanut allanngortinneqarsinnaapput.