Tappiitsoq: Inuuninni puiunaannerpaasussaangaluaq

Misigisassarsiortartoq tappiitsoq qallunaaq Arne Christensen assut pakatseqqavoq. Taassuma ataasinngornermi 15. april Qalasersuaq Avannarlermut sikukkut ujaakkaarluni aallartinnissaraluara, taamaateriasaarpoq. Sisorartartut allat hunnorujut peqatigalugit nunarsuup qaavanut misigisassarsiornissaraluarani taamaatiinnartariaqarpaa.

- Inuuninni puiunaannerpaasussaangaluarpoq. Angalanissap taamaatinneqarnera assut aliasuutigalugu pakatsissutigeqaara. Ikiortigalu Claus Geleff angalanissatsinnut piareersimalluinnaraluarpugut, taamaatinneqarporli, 65-inik ukiulik Arne Christensen Københavnip avannaani Virum-imi najugalik oqarpoq.

Nutaarsiassaqartitsiviit arlallit ilaatigut Svalbardiminngaanniik Icepeople.net ukioq manna Qalasersuaq Avannarlermut angalinissaraluap taamaatinneqarnera Ruslandip Ukrainillu akerleriissuteqarnerannik pissuteqartoq ilaatigut Ruslandip Krim-imik tiguaasimanera pissutigalugu.

Politikkikkut aaqqiagiinnginneq

Russit atorfilittaasa ukrainimiut timmisartortaruinik ilaasuinillu Det Arktiske Ocean-imut meqqusiunnaarnerat, politikkikkut aaqqiagiinngissuteqalerneq pissuteqarmat Qalasersuaq Avannarlermiit 130 kilometerisut ungasitsigisumi sikukkut mittarfiliornissap naammassineqarnissaa unitsinneqarpoq .

– Ukioq manna Qalasersuaq Avannarlermut ilisimasassarsiornissat tamarmik russinit unitsinneqarput, Arne Christensen oqarpoq.

Taanna ukiuni arlalinni angalanissaminut piareersarsimavoq, nunarsuarmilu siullersaalluni tappiitsuni Qalasersuaq Avannarleq ujakkaarluni tikittussaangaluarlugu. Suna tamarmi pilersaarusiorluagaangaluarpoq. Taassuma suleqataatalu aningaasat millionit affaat katersorsimangaluarpaat.

Ukrainimiut timmisartuat ukrainimiunik timmisartortartulik Anders Christen ilaalu Longyearbyenimiit Svalbardimiittumiit angallattussaangaluarpaat. Svalbard Norgep avannarlersaata Qalasersuullu Avannarliup akornanni inissisimavoq.

Sumiiffiup ilaata ammarneqarnissaralua ukioq manna russinit taamaatinneqarpoq, ukrainimiullu aammalu ukrainimiut timmisartui sumiiffiup iluani ukrainemi oqartussaasuinit timmisartoqqusaajunnaarlutik. Misigisassarsiortartut 250-300 missaanni sumiiffiup ammarneqarnissaa ulluni arlinni sapaatip akunneriluunniit arlallit Longyearbyenimi utaqqisimangaluarpaat.

- Akunnittarfiit ulikkaaqqapput, inuillu ilaat torsuusani sinittariaqartarlutik, Arne Christensen oqaluttarpoq.

Svarlbardimi nikeriarfeerunneq

Sumiiffiup ukiut 18-it ingerlanerani aatsaat matuneqarnera pissutaalluni misigisassarsiortartut Svalbardimi nikeriarfeeruteqqapput. Norskit nittartakkatigut nutaarsiassaqartitsivia, Barent Observerip oqaluttuaraa, Ukrainimi politikkikkut oqartussaasui sikumut minnissaq itigartitsissutigisimagaat. Sumiiffillu Arne Christensenip misigisassarsiortartullu allat aallarfissaraluat 2019 naanissaanut russit oqartussaasuinit aamma matuneqarpoq.

- Pisut assut tupinnaqaat. Sapaatip akunnerata siuliani ilisimatinneqarpugut timmisartut ajoquteqartut taamaammallu ilisimasassarsiorneq ulluni pingasuni kinguaattoorfiussasoq. Tamaammat Danmarkimiit aallarnissarput ullualunnik kinguartipparput. Tallimanngormat 20.45 Kastrup Mittarfianiit Oslomut kingornalu Svalbardimut angalanissatsinnut piareersimalluinnarsimavugut sunalu tamaat poortoreersimangaluartigut. Ulloq taanna nalunaaqutaq 16.45 ukrainimiut angallasserusunngimmata russillu sikumi matusisimanerat pissutigalugu angalanissaraluaq taamaatinneqartoq nalunaarfigitippugut, Arne Christensen oqarpoq.

Ukiup tullianut piareersimasoq

Ukiullu tulliani aprilip qaammataani ilisimasassarnissani piareersimaffigaa. Arne Christensenip neriutigaa, ukiut siuliini pisarnertut sumiiffik Svalbardimiillu timmisartuussinerit russinit ammaneqarumaartut taamaalilluni ilisimasassarsiornissani piviusunngussammat. Misigisassarsiortartup anguniakkani qaffasinnerpaaq tappiitsunilu siullersaalluni sisoraaserluni Qalasersuaq Avannarlermut apuukkuni angussavaa.