Tapiissutit tunniunneqarsimasut IA-p misissugassanngortikkusukkai

IA-p Aalisarnermut, Piniarnermut Nunalerinarmullu Naalakkersuisoqarfik Inatsisartut kukkunersiuinermut ataatsimiititaliaanit misissuiffigineqaqquaa. Namminersorlutik Oqartussanit aalisariummik pisinissamut tapiiffigineqarnissamik qinnuteqaammut atatillugu aalisartuaqqat pilliutigalugit naalakkersuinermik suliallit salliutinneqartarnersut partiip misissortikkusuppaa.

Naalakkersuinermik suliaqartut nuimasut pingasut Karl-Kristian Kruse, Henrik Fleischer aamma Nikolaj Jeremiassen aalisariummik pisinissaminnut Namminersorlutik Oqartussanit annertuumik tapiiffigineqarsimasut Sermitsiap paasisaqarnerata kingornagut IA aarlerisaarivoq.

Aviisi Sermitsiaq taama allappoq.

Partiip illuatungiliuttup Inatsisartut kukkunersiunermut ataatsimiititaliaanit sukumiisumik misissuisoqarnissaa kissaatigaa. Misissuinermi siunertaavoq assigiinngisitsisoqarsimanersoq paasiniarneqassasoq, taamaalillutik naalakkersuinermik suliaqartut aalisartuusut aalisartuaqqat nalinginnaasut aalisariummik pisinissaminnut aalisarnerup aningaasaliiffigineqarnissaanit aningaasaliissutinit aningaasatigut taperneqarnissamik qinnuteqarnerannut atatillugu salliutinneqartarsimanersut.

Aningaasaliissutit aningaasanut inatsimmiittut Aalisarnermut, Piniarnermut Nunalerinermullu Naalakkersuisoqarfimmit aqunneqarput.

- Misissuiffigineqarnissaa kissaatigaarput Naalakkersuisoq aamma Aalisarnermut, Piniarnermut Nunalerinermullu Naalakkersuisoqarfiup naalakkersuinermik suliaqartunut sulianik suliarinnissimanersut, qinnuteqartunit allanit naalakkersuinermik suliaqartuunngitsumit sukkanerujussuarmik, aalisarnerup aningaasalerneqarnissaannit aningaasaliissutinit pissarsinissaminni. Naalakkersuisoq maleruagassat naapertorlugit sulisimanersoq apeqquserparput, qinnuteqartullu assigiinngitsinneqarsimanersut, IA-mi aalisarneq pillugu oqaaseqartartoq Aqqaluaq B. Egede oqarpoq.

Isumaqarpoq misissuinermi susoqarsimanersoq qulaajarneqassasoq, aalisarnerullu aningaasalernissaanut aningaasaliissutit pillugit inatsimmi maleruagassat atorfilittanit Naalakkersuisumillu malinneqarsimanersut.

Powered by Labrador CMS