Tapersersuisunit pinngitsoornagu piumasaq: Timmisartuussinermi akitsuutit allanngortinneqassapput

Timmisartuussinermi akitsuuteqalersitsinissamut nalunaarutigineqareersut allanngortinneqanngippata, Nivi Olsen, Demokraatini siulittaasutut maanna inissisimasoq, Kim Kielsenip Inatsisartuni ikinnerussuteqartutut inissinnissaanut piareersimavoq.

Aap, Nivi Olsenip piumasaraa akitsuutit maannakkutut nalunaarutigineqartut atulinngisaannassasut. Akitsuutissatut nalunaarutigineqareersut ukioq nutaamiit atuutilertussaagaluarput.

Nunap iluani ukiukkut angalaneq akisunerulissaaq

Akitsuusiinissami nunap iluani angallanneq ukiukkut akitsorneqassaaq, nunanullu allanut angalasunut akitsuut apparneqassalluni.

IA aamma Partii Naleraq akitsuutissanut, Naalakkersuisut akuerisimasaannut, isornartorsiuingaatsiarput. Julia Pars, Visit Greenlandimi pisortaasoq isumaqarpoq takornariartitsinermi ukioq kaajallallugu sulisoqartalernissamik anguniakkamut tamanna unitsitsissasoq.

Naalakkersuisoqarfimmi kisermaassineq

Sermitsiaq.AG-p paasisai naapertorlugit akitsuusersuinissamut suliaq attaveqatigiinnermut naalakkersuisoqarfimmi atorfilittanit suliarineqarsimavoq, sulinermilu qaqugukkulluunniit Air Greenland peqataatinneqarsimanani. Air Greenlandip ilisimaarilluinnarpaa akitsuusiinerup kingorna angalasut qanoq akiliinerusalissanersut.

- Sumiiffinni najugaqartut suli annertunerusumik mattunneqarnerunissaat akuerisinnaanngilarput. Nunatsinni nunap iluani angalaneq taama akisoreertigisoq. Naalakkersuisut ikinnerussuteqalerusunngikkunik aaqqiissummik allamik nassaartariaqarput, Nivi Olsen Sermitsiaq.AG-mut oqarpoq.

Taassuma erseqqissaatigaa inuiaqatigiinni kalaallini akitsuusersuinerit Demokraatit isumaqatiginngereeraat.

- Siornatigut neriorsuutigereerparput silaannakkut angalaneq akisunerulissanngitsoq, akikinnerulissasorli. Taamaammat aaqqiissutissamik allamik saqqummiussisoqartariaqarpoq, nunap iluani ukiukkut silaannakkut angalasut eqqorneqaqqunagit, Nivi Olsen erseqqissaavoq.

Naalakkersuisoq marlunngorpat piffissaqarpoq

Sermitsiaq.AG-p Attaveqatigiinnermut Naalakkersuisoq Karl Frederik Danielsen oqarasuaatikkut apersorumallugu tallimanngornermi saaffigaa, taassumalli allattaata ilisimatitsissutigaa Karl Frederik Danielsen marlunngornermi aatsaat piffissaqartoq. Suliaq pinartutut isigerpasinngilaa.

Sermitsiaq.AG-p Mittarfeqarfiit pisortaa Henrik Estrup sisamanngormalli oqaaseqartinniarsimagaluarpaa. Oqarasuaatikkulli attavigineqarsinnaanngilaq aaqqissuisoqarfiullu mailikkut saaffiginnissutai aamma akineqaratik.