Tanja: Ukiuni arfineq-pingasuni siulersuisutut suliaqarneq naammaqaaq
Ukiortaami siulersuisuunerit taarsernerannut atatillugu Tanja Nielsenip Royal Arctic Linemi ukiuni arfineq-pingasuni siulersuisuni ilaareerluni siulersuisuniikkunnaarpoq. Tamannali pissusissamisut ingerlavoq, oqarpoq.
Tanja Nielsen Royal Arctic Line ukiuni arfineq-pingasuni siulersuisuni issiareerluni unittariaqalersimavoq. Uninnerli uippallernartoqarsimanngitsoq, kemimi cand. scient 49-nik ukiulik oqaluttuarpoq.
- Aqutsisuulluarneruvoq ukiut arfineq-pingasukkuutaarlugit siulersuisuni ilaasortat taarserneqartarnerat, taamaammat naatsorsuutigereersimavara ajorsarnertullu isiginagu. Ukiut arfineq-pingasut naammaqaat. Issiavimmi issianiinnartuusanngilanga, Tanja Nielsen oqaluttuarpoq.
Royal Arctic Linep siulersuisuini 2011-mi ilaasortanngorpoq. Taassuma siuliani Kalaallit Nunaanni aatsitassarsiornermik suliaqarnermi ukiuni arlalinni misilittagaqareerpoq, ilaatigut Nalunaq-mi avatangiisinut pisortatut, olivinimik piiaaffimmi Seqimi aammalu Carl Bromi aatsitassat pillugit siunnersuisutut sulisimalluni.
Amerlasuut ilinniagassaasimapput
- Naalakkersuisut siulersuisuni issiasussatut toqqarsimammannga ataqqinaatitut tigusimavara maniguullungalu, aammali sorpassuit ilinniaqqaagassaasimapput. Siulersuisuni ilaasortanngorlaat pikkorissarneqarnerannut peqataavunga, Royal Arctic Linellu naatsorsuisoqarfiannit suliffeqarfiup aningaasaqarnera pillugu itinerusumik saqqummiiffigineqarlunga.
- Tamanna aamma isumaqarpoq Royal Arctic Linemi taamani siulersuisuni siulittaasuusup Martha Labansenip isumagilluarmanga. Taanna aqqutissiuussitutut pikkorilluinnarpoq.
Tanja Nielsen Royal Arctic Linemi aalajangigassat annertuut aalajangerneqarnissaannut peqataasimavoq. Eimskipimik suleqatigiilernermut aalajangernermut peqataasimavoq, umiarsuillu milliuunilikkaanik naleqartut arlallit pisiarineqarnerinut aalajangeeqataasimalluni. Umiarsuaatileqatigiiffik inuiaqatigiinnut kalaallinut pingaaruteqarluinnartuuvoq – umiarsuillu nutaat IT-milu atortorissaarutit nutaat pillugit aalajangernermi naleqartitat annertuut eqqaamaneqartariaqarput.
Qulaaniik isigisinnaaneq pingaaruteqarpoq
Tanja Nielsen nammineerluni isumaqarpoq Kalaallit Nunaanni nunaqarfiit pillugit ilisimasaqarluarnini siulersuisuni ilaasortaanermini nukittoqutigisimallugit.
- Sikuerneranit umiarsuaq siulleq nunaqarfimmut tikikkaangat qanoq pingaaruteqartigisoq ilisimavara, taamaammat angalanerit pilersaarutit isumaqatigiissutillu malillugit ingerlanissaat uannut pingaaruteqarpoq.
- Siulersuisuni ilaasortatut uagut nammineerluta umiartortanngilagut, kisiannili isumaqatigiissutigineqartut pillugit pisortaqarfik eqqaasittuartussaavarput, suliffeqarfiup ingerlanissamitut innissaa siunertaralugu.
Amerlasuulli ilinniaqqaagassaagaluartut, taamaattoq Tanja Nielsen isumaqarpoq unammillernartut pitsaasumik naammassisimallugit.
- Siulersuisuni ilaasortatut qulaaniik takunnissinnaaneq pingaaruteqarpoq, isumaqarpungalu avataaniit takunnissinnaalluarsimallunga aaqqinniagassallu illuatungaanut saatissinnaasimallugit.
Tanja Nielsen RAL-imi siulersuisuni ilaasortaanermi nalaani Aarhusimut nuuppoq, maannalu danskit imermik pilersuisut suliffeqarfiisa peqatigiiffianni Danvami siunnersortitut sulilluni. Siulersuisuni sulinermik suli soqutigisaqarpoq, Aarhusimilu Kalaallit Illuutaanni siulersuisuni maanna siulittaasuulluni.