Piiaaffiit
Tanbreezip upernaaru akuersissummik pissarsinissani neriuutigaa
Tanbreezip naalakkersuisoqarfimmik ataatsimeeqateqarnermi kingorna sapaatip-akunnerini tulliuttuni qinnuteqaatini pitsanngorsarniarlugu siunniuppaa
Aatsitassarsiornermik ingerlatseqatigiiffik Tanbreez aatsitassarsiornermut oqartussaqarfillu maanna kiisami imminnut nassaarinialerpasipput.
Taakku aatsitassanut naalakkersuisoq, Múte Bourup Egede (IA) ataatsimeeqatigeqqammerpaat.
- Ataatsimiinneq ingerlalluarlunilu pitsaavoq, Bolette Maqe Nielsen Tanbreez Greenland Mining A/S-imi siulersuisuni siulittaasuugallartoq oqarpoq.
Múte Bourup Egedep aamma ataatsimiinneq pitsaasumik ingerlanneqartoq nalunaarutigaa.
Atuaruk: Tanbreez aamma Naalakkersuisut akornanni isumaqatigiinnerit angusaqarfiulersut
Iluarsisassat ilisimaneqartut
Tanbreezip ukiut sisamat affarlu qaangiuttut qinnuteqaat siulleq tunniunneranit qaangiuttullu, ringbindit 44-ni quppernerit sorlerpiaat iluarsisassaanersut maanna paasisutut misigisimavoq.
- Iluarsiinerit kingulliit decembarimi nassiunneqarnissaat Aatsitassanut Aqutsisoqarfik isumaqatigiissuteqarfigaarput, Bolette Maqe Nielsen nassuiaavoq.
Qinnuteqaatip siulliup nassiunneqarnerata kingorna aatsitassanut inatsimmi maleruagassartaanilu allanngortoqarnikuuvoq, tamatumalu iluarsiinissaq pisariaqartilerpaa.
Atuaruk: Tanbreezip aatsitassarsiornissamut qinnuteqaataa akuerineqanngilaq
Upernaaru akuersissut
Isumaqatigiinniarnerit kingulliit juullip kinguninngua aallartissinnaanerat, Tanbreezip siunniuppaa.
- IBA (pingasuulluni isumaqatigiissut) aamma matusinissamut pilersaarut marsimi imaluunniit apriilimi, aqqutitsinni aporfiit kingulliit piaarnerpaamik isumaqatigiissutiginissaat soorunami ingerlatiinnarnissaat neriuutigaarput, taamaalilluta piiaanissamut akuersissummik pissarsiniassagatta.
Qinnuteqaat nutartigaq nutaamik tusarniaanissamik pisariaqartitsissanersoq, Tanbreezip suli iluamik paasinngilaa.
Atuaruk: Tanbreez Naalakkersuisunik suli isumaqatiginninniarpoq
Nutaamik tusarniaasoqannginnissaa neriuutigigaat
Ukiumut piiagassatut siullermik qinnuteqaatigisatik qinnuteqaatigeqqinniarlugit, ingerlatseqatigiiffiup tikkuarpaa. Taamaalilluni avatangiisinut sunniutissai VVM-imi nalunaarusiami allaaserineqareersumit annertunerussanngillat, taakkulu tusarniaassutigineqareerput.
- Nutaamik tusarniaasoqaqqinnissaa pinngitsoorsinnaanissaa neriuutigaarput, 1/2 millioni tonsinik piiaanissarput attatiinnaratsigu - tassa imaappoq, siullermik qinnuteqaatigeriikkagut, siulersuisuni siulittaasuugallartoq oqarpoq.
Nutaamilli tusarniaasoqarnissaanik apeqqummut Naalakkersuisut aalajangiisussaapput.
- Inatsisitigut nalunaarusiat pisussaaffigineqartut (VSB aamma VVM) nutaamik tusarniaaffigineqassappata, soorunami tamanna ataqqineqassasoq naqissuserneqarpoq, Bolette Maqe Nielsen oqarpoq.
Atuaruk: Barnes: Kalaallit Nunaata 1 milliard dollarsit annaavai
Eqqagassartaqarpianngitsoq
Avatangiisinut sunniutissai siullermik ilimagineqartumit annikinnerungaatsiassapput. Eqqagassat amerlassusaat, tailingsinik taagorneqartut, taamaallaat 3 aamma 5 procentit akornanniissapput, siullermik 30-40 procentiunissaat ilimagineqaraluarpoq.
Tanbreezip aatsitassap ilaa, arfvedsoneti qalequtissiarinissaanik paasinninnerat tamatumunnga tunuliaqutaavoq.
- Avatangiisinut sunniutissat allannguuteqanngitsut, tailingsit annikinnerulerneri eqqaassanngikkaanni, nutaamik tusarniaassutigineqannginnissaat neriuutigaarput, Bolette Maqe Nielsen naqissusiivoq.