Tanbreezip suliniutaa ernumanartoqartinneqarpoq
Avatangiisinik illersuiniaqatigiiffiit Noah-p aamma Urani Naamik, paasisinnaanngilaat Tanbreez, tusarniaaneq ukiunik arfineq-marlunnik pisoqaassusilik tunngavigalugu atuinissamut akuersissummik tunineqarmat. Tamanna peqatigalugu tupigusuutigaat nunarsuarmiunut kingornussassiaq tamassuma eqqaaniittoq, aatsitassarsiornermik suliniummi sumilluunniit eqqarsaatigineqarsimanngimmat.
Kikkut tamarmik tipaatsuutiginngilaat Australiamiut ingerlatseqatigiiffiat Tanbreez, Kujataani Killavaat Alannguanni nunami 18 kvadratkilometerinik annertussusilimmi ukiuni 30-ini atuinissamut akuersissummik tunineqarmat.
Aviisi Sermitsiaq taama allappoq.
Akerlianik avatangiisinik illersuiniaqatigiiffiit Noah, Narsamilu Uranimut Naamik ernumanartoqartitsisorujussuupput, taakkualu akuersissummik takunninnissamut qinnuteqarsimapput, takuniarlugu akuersissummi suut pineqarnersut.
- Suliap ingerlanneqarnera tamaat tupigaarput, pissutigalugu akuersissut tunniunneqarsimassammat tusarniaaneq ukiunik arfineq-marlunnik pisoqaassusilik tunngavigalugu, allaallu VVM-imut nalunaarusiaq nutartigaq, 2016-imi saqqummiunneqartoq, eqqarsaatiginagu, Noah-p oqaaseqartartua Niels Henrik Hooge oqarpoq, innersuussutigalugit paasissutissat, nettimi tusarniaanermut isertarfimmi takuneqarsinnaasut.
- Aamma tusarniaanermi akissutini oqartussaasut kissaatigisaat isummerfigineqarsimanngilaq, tassa ingerlatseqatigiiffik Kalaallit Nunaanni akuutissanik kemiskiusunik immikkoortiteriffimmik pilersitssasoq, taanna akileraarutinik amerlanerusunik isertitsissutaassammat, aammattaarli avatangiisinut ajornartorsiutinik annertuunik kinguneqassalluni, Niels Henrik Hooge oqarpoq, innersuussutigalugu isumaliutissiissut, Letto Advokaterne 2015-imi suliarisimasaat.
Tanbreez pillugu suliaq nuannaalersitsillunilu allanut ernumalersitsivoq. Tamanna pillugu aviisimi Sermitsiami atuarnerusinnaavutit. Aviisi uani pissarsiariuk:
