Tanbreezip qinnuteqaataani pisariaqartinneqartut suli amigaatigineqarput
Tanbreex Killavaat Alannguanni aatsitassanik qaqutigoortunik qanittumi piiaalernissani neriuutigaa. Qinnuteqaammili pisariaqartinneqartut suli amigaatigineqarput.
Killavaat Alannguanni aatsitassarsiorfissatut pilersaarutigineqartoq pillugu Tanbreezip qinnuteqaatimini amigaatigineqartut suli aaqqinngilai.
Aviisi Sermitsiaq taama allappoq.
Qaammatip aallartilaarnerani Tanbreez Kommune Kujallerlu paaseqatigiillutik atsioqatigiipput aatsitassarsiorfimmi pilersaarutigineqartumi sanaartornermi aatsitassanillu qaqutigoortunik piiaanermi najugaqafissullu suliffeqarfiutaasa atornissaat pillugit.
Tanbreezillu pisortaa Greg Barnes Sermitsiamut oqarpoq piiaanissamut akuersissut tigungajalerlugu neriuutigalugu.
Tamannali suli tikinneqaqqajanngitsoq, aatsitassaqarnermut naalakkersuisoqarfik erseqqissaavoq.
– Tanbreezip kommunillu akornanni paaseqatigiilluartoqarmat soorunami ajunngitsuuvoq. Tamanna inuiaqatigiinni piujuaannartitsinermik tunngavilimmik ingerlatsinissamut isumaqatigiinniarnissamut annerusumik sunniuteqassaaq. Tanbreezimi immikkut ilisimasallit ilaannik pulaartoqar- nikuuvugut, apeqqutit teknikimut tunngassuteqarnerusut paasisaqarfiginerorusukkatsigik. Tamakku Tanbreez peqatigalugu sapaatip-akunnerani matumani misissuataassavavut. Qinnuteqaatini amigaataasut Tanbreezimut aamma oqaloqatigiissutigeqqissavavut, qanoq aaqqiiviginissaat anguniarlugu oqaloqatigiissalluta, Aatsitassanut naalakkersuisoqarfimmi pisortaq Jørgen Hammeken-Holm Sermitsiamut oqarpoq.
Tanbreezip pilersaarutai pillugit aviisimi Sermitsiami atuarnerusinnaavutit, aviisi uani ataani pissarsiarisinnaavat: