Tanbreezip piiaanissamut akuerineqarnissaa qanilliartorpoq

Killavaat Alannguani aatsitassanik qaqutigoortunik piiaanissamut suliaq ingerlariaqqippoq.

Suliap sivisuumik suliarineqareernerani Tanbreezip Kujataani aatsitassarsiornissaa neriuutigineqarsinnaalerpoq.

Killavaat Alannguanimi aatsitassanik qaqutigoortunik piiaanissamut suliaq sivisungaatsiartumik suliarineqareerpoq.

Tanbreez 2001-imi aatsitassanik qaqutigoortunik sumiiffimmi ujaasilluni aallartippoq, Killavaat Alannguanilu piiaanissaminut 2013-mi siullermeerluni qinnuteqarluni. Aatsitassarsiornerli pillugu oqartussat isumaqarput paasissutissat naammanngitsut suliarlu ingerlariaqqissinnaanani. Suliap paamaarunneqarnera pillugu Tanbreezip pisortaa Greg Barnes arlaleriarluni naammagisimaarinnani oqartarsimavoq.

- Kiisami ingerlariaqqippoq

Suliarli maanna ingerlallualeqqittutut isikkoqarpoq.

Aatsitassarsiornermut naalakkersuisoqarfik tusagassiutinut nalunaaruteqarluni allappoq ‘massakkorpiaq tigussaasumik pitsaasumillu paaseqatigiinniarlutik oqaloqatigiittut qallukkanik nioqqutigineqarsinnaasunik Tanbreezip takutitsillunilu killiliinissaa pillugu, tassami aatsitassanut inatsit naapertorlugu iluaqutigineqarsinnaasumik aatsaat takutitseqqaarlutik killileeqqaarlutillu piiaanissamut akuersissummik tunineqarsinnaagamik.’

- Oqiliallaatigeqisatsinnik maanna takusinnaalerparput Tanbreezip pilersaarutaa kiisami siumut aallarsimasoq. Tanbreezimeersugut Naalakkersuisoq Erik Jensen pingaartumillu Kommune Kujalleq kiisalu borgmester Kiista P. Isaksen ikiuunnerannut qutsaviginiarpakka, Greg Barnes tusagassiutinut nalunaarummi oqarpoq.

Suliami ajornartorsiutit suusimanersut aamma tusagassiutinut nalunaarummi taaneqallatsiarput. Aatsitassap eudialytip piiarneqarnissaa pineqarpoq.

- Aatsitassarsiorfiit allat assigalugit pilersaarut iluatsinngitsooratarsinnaavoq. Periaatsit eudialytimik immikkoortiterinermi atorsinnaasut suli nassaarineqarsimanngimmata pilersaarut ajutoorsinnaalluarpoq. Taamaammat pilersaarut pitsaanerpaamik ineriartortissinnaajumallugu Tanbreez aallaqqaammut annikitsuinnarmik tunisassiorniarpoq. Tunisassiorneq iluatsilluariaruni annertusineqarsinnaavoq.

Kujataani nuannaarutigineqarpoq

Aatsitassarsiornerup sanaartornissaa ajornartussaanngilaq. Aatsitassarsiorfimmi ujaqqeriviussaaq, Tanbreezilu ukiumut akuiagassanik 500.000 tonsinik piiaasassalluni. Ujaqqat piiakkat aserorterneqassapput. Immikkoortiterineq pisassaaq saviup kajungerisaa atorlugu, taamaaliornikkullu aatsitassat aappalaartunut (eudialyt), qaqortunut (feldspat) aammalu qernertunut (amfibol) immikkoortiterneqassallutik. Tanbreezip kissaataa tassaavoq aatsitassaq eudialyt aappalaartuusoq nunani allani akuiaavinnut aallarunneqartassasoq, tassanilu eudialyt ilaatigut svolvsyre atorlugu pinngoqqaatinut immikkoortiterneqassalluni, pinngoqqaatillu nioqqutigineqarsinnaasut nioqqutigineqartassallutik.

- Aatsitassarsiorfiliariniagaq angisoorsuunngilaq, ingerlalluarunili ukiuni qulikkaani qassiini ingerlasinnaalluni. Kujataanilu ilorraap tungaanut saatitsinissaq pisarialerujussuuvoq. Taamaammat pilersaarutip nunatsinnut, Kommune Kujallermut aammalu Tanbreezimut iluaqutaanissaa ilungersuutigisariaqarparput, Aatsitassarsiornermut naalakkersuisoq, Erik Jensen (S) oqarpoq.

Suliami ingerlariaqqittoqarnera Kommune Kujallermi borgmesterip nuannaarutigaa.

- Tanbreezip aatsitassanik tunisassiulernissaa Kommune Kujallermit qilanaareqaarput. Aatsitassarsiorfiit annerpaamik pissarsiffigineqarnissaat 2014-imiilli kommunimit siunniunneqarsimavoq. Suliffissat kisiisa eqqarsaatiginngilavut, aammali aatsitassarsiorfiup sullinneqarnerani sapinngisamik annerpaamik peqataanissarput siunniusimavarput. Suliffeqarfiit kommunimi ittut kiffartuussinissamik isumaqatigiissuteqarsinnaanerat inuussutissarsiutitigut ineriartortitsinerup iliuatsilluarnissaanut apeqqutaasut ilagilluinnarpaat. Tamatumuunakkut pissutsit ajorsiartuinnarnerat kommunimi nalaassimasarput unitsinneqarsinnaavoq, Kiista P. Isaksen (S) oqarpoq.

Aatsitassaq eudialyt pinngoqqaatinik niobiumimik, tantalummimik, zirkoniummimik aammalu aatsitassanik qaqutigoortunik assut akoqarpoq, taakkulu saffiugassanut akussatut akooruminarsaatitullu atorneqartarput kiisalu oqarasuaatini angallattakkani, anorisaatini aammalu orsussani immersartuni atorneqartarlutik.

Powered by Labrador CMS