Tanbreez maanna aallartikkiartuaalerpoq
Suliassat kingulliit inissinniarneqartussanngorput, suliffeqarfiullu neriuutigaa, piiaaffik 2024-p aallartinnerani sanaartorlugu aallartissinnaassallugu, suliffeqarfiup pisortaanera nutaaq oqaluttuarpoq.
- Aallartissinnaalerniassagatta suut tamaasa inissinniarlugit ilungersorluta suliaqarpugut, Tanbreezimi pisortaaninngortoq, CEO Christopher Messine, USA-meersoq, oqarpoq.
Aviisi Sermitsiaq taama allappoq.
Messina pisortaaninngunngikkallarami Tanbreezimut ukiut sisamat sinnerlugit periusissiornikkut siunnersortaavoq Amerikamilu naalakkersuisunut periusissiornikkut siunnersortaalluni.
- Maannakkorpiaq isiginiakkavut marluupput. Siullertut, aningaasalersuinissamik inaarutaasumik inissiiniarnissaq, aappaattullu, Aatsitassanut Naalakkersuisoqarfimmut pappiarat tamarmik ajunngitsuunissaannik qulakkeerinninniarnissaq. Tamanna aasaru inississasoq naatsorsuutigaarput, oqarpoq.
Aatsitassanut Naalakkersuisoqarfiup pisortaa Jørgen T. Hammeken-Holm paasissutissiivoq, piiaanissamut matusinissamullu pilersaarusiaminnik kiisalu sillimmasiissuteqarnissaminnik Naalakkersuisut akuersissutiginninnissaannut piffissaliunneqartumik Tanbreez 2023-p naanissaanut kinguartitsisimasoq. Pissutsit taakkua marluk 31. decembari 2022 nallertinnagu akuersissutigineqarsimasussaagaluarput.
Kisianni sooq taama sivisutigissava – 2020-mimi piiaanissamut akuersissut pissarsiaraarsi?
– Aningaasanik niuerfik suleqatigiuminartuusimanngilaq. Pingaartumik coronap nalaani. Kalaallit Nunaatalu aatsitassat pillugit nutaamik inatsiseqaleraluttuarnerata pissutsit uagutsinnut ajornannginnerulersinngilai. Tamanna nalorninermik isumaqarpoq, tamannalu aningaasanik niuerfimmit nuannarineqanngilaq. Taamaattumik tamanna aningaasalersuinermik aallerfiginiakkatsinnut oqaloqatiginnissutigisariaqarsimavarput, Messina oqarpoq.
Aviisimi Sermitsiami atuarnerusinnaavutit. Aviisi uani pissarsiariuk:
