Kujataani Killavaat Alannguani aatsitassanik piiaanissamut akuersissuteqarnermut atatillugu marlunngormat atsioqatigiinnermi Tanbreezimit sinniisuutitaq, najukkami politikkeri Simon Simonsen (S) Aatsitassanullu Naalakkersuisoq Jens-Frederik Nielsen peqataapput. Ulloq nuannersuuvoq, aatsitassarsiutileqatigiiffik tusagassiorfinnut nalunaaruteqarnermi erseqqissaavoq.

- Tanbreezimit nuannaarutigilluinnarparput, Kujataani aatsitassat arlallit piiarneqarnissaannut akuersissummik pissarsinerput, taakku allapput.

Ingerlatseqatigiiffimmilli eqqumaffigineqarpoq, aatsitassarsiornissap ineriartortinneqarneranut soqutigisaqaqatigiit arlallit ernumassuteqarnerat. Ilaatigut maluginiarsimavaat, inuit ilaasa aatsitassat piiarneqarniartut aatsitassanut qaqutigoortunut allanut attuumassuteqartittaraat.

- Taakku isumaannut akerliusumik Tanbreezimi aatsitassat Thoriumimik Uranimiluunniit akoqanngillat, ingerlatseqatigiiffiullu piiagassai taakkunannga akoqaraluarpataluunniit, ingerlatseqatigiiffimmit siunertarineqanngilaq taakkunannga tunisassiornissaq, taakku oqaatigaat.

Pinngoqqaatit qinngornernik ulorianartunik akoqanngitsut 

Piiaanissamut akuersissut pinngoqqaatinik qinngornernik ulorianartunik akulinnik piiaanissamik ilaqanngitsoq, Aatsitassanut Naalakkersuisup Jens-Frederik Nielsenip (D) Sofia Geislerip (IA) paragraf 37 naapertorlugu apeqqutaanut akissuteqarnermini uppernarsarpaa.

Kujataanili aalisartut aamma eqqasuuteqarput. Killavaat Alannguanimi saarullinniartarneq talittarfiliornissarlu ernummatigaat. Taakkumi oqaatigaat, saarullinniartarnerup annersaa aatsitassarsiorfiusussami ingerlanneqartartoq. Tanbreezip pisortaata tamanna ilisarisinnaannginnerarpaa.

- Tupaallaatigaara saarulliit 70%-iisa kangerlummit tassannga pisuunerarneqarnerat, aatsitassarsiorfigineqarniartumimi qaqutiguinnaq inuit aalisartartut takuneqartarmat. Misissuisimanitta takussimavaa, aatsitassarsiornissap saarulleqarnermut annikitsuaqqamik sunniuteqassasoq imaluunniit sunniuteqanngivissasoq, Greg Barnes Sermitsiaq.AG-mut oqarpoq.

Taassuma erseqqissaatigaa, 1980-ikkunili avatangiisinut sunniutaasinnaasumik misissuisarsimanerit takutissimagaat, aatsitassat qallorneqartussat eqqakkallu akuutissanik ulorianartumik akoqanngitsut.

- Suliffeqarfik 2001-ip missaanili ilanngunneqarmat tamanna misissorneqartuarsimavoq. Ullumikkut aamma sumiiffimmi arlalinnik nakkutilliissutinik atuivugut, taakku assersuutigalugu sialummik, nittaalarneranik, anorimik, silap kissassusaanil il. il. uuttortaasarput.

- Aatsitassarsiornerup ingerlanneqarnerani nakkutilliineq ingerlanneqartuassaaq, Maannamulli siunnersortivut arlaannaannulluunniit attuumassuteqanngitsut avatangiisinut ajoqusiisinnaasunik nassaarsimanngillat, Greg Barnes oqarpoq.

Nunarsuarmiunut kingornussassiaq ernummatigineqartoq

Avatangiisinik illersuiniaqatigiit Noah aamma Urani Naamik Kujataani nunarsuarmiunut kingornussassiap aatsitassarsiorniarnermi eqqarsaatigineqannginneranik aamma ernumassuteqarput.

Namminersorlutik Oqartussat Sofia Geislerip paragraf 37 naapertorlugu apeqqutaanut akissuteqarnerminni ilisimatitsissutigaat, UNESCO-p nunataata illersugaasup ilaa 5-imiinngittoq, taamaammallu aatsitassarsiornerup Kujataanut sunniutigisinnaasaanik misissuisoqarnissaanik piumasaqaateqanngitsoq.

Kultureqarnermut, Ilinniartitaanermut Ilageeqarnermullu Naalakkersuisoqarfiup paragraf 37 naapertorlugu apeqqmmut akissuteqarnermi ilisimatitsissutigaa, qaammammi matumani UNESCO-mit saaffiginnissummik tigusaqarsimallutik, tassani ilaatigut Tanbreezip suliniutaata killiffianik ilisimatinneqarnissaq qinnutigineqarsimalluni.

Taamaammat Tanbreezimut tunngatillugu UNESCO-mut akissuteqaatissaq maannakkorpiaq suliarineqartoq ilisimatitsissutigineqarpoq.