Tammajuitsussanik piniartitsisartut quarsaaqqasut
Tammajuitsussanik piniartitsisarnermut piffissaliussat nutaat piniartitsisartunit quarsaarutigineqarput, taakkunanngalu Kalaallit Nunaata nunatut takornariartarfittut tusaamanerlugaalernissaa ernummatigineqarpoq.
Naalakkersuisut tammajuitsussanik piniartitsisarnermi piffissanik ilisimasaareqqaarnatik allanngortitsereersullu Qeqqata Kommuniani tammajuitsussanik piniartitsisarnermik aaqqissuussisartut aalassassimaalerput, aviisi Sermitsiaq allappoq.
– Paamaarussinerullunilu takornariaqarnermik inuussutissarsiummik paasisimasaqannginneruvoq, Erik Lomholt-Bek, suliffeqarfimmit Trophy Hunting Greenlandimeersoq, oqarpoq.
Aallaasitik nassarlugit piareersimareeraluartut
– USA-mit aallaanianik marlunnik Kangerlussuarmut juulip 12-ani tikittoqarpunga. Taakkua aallaasitik nassarlugit piareersimareeraluarput tammajuitsussanik piniartitsinermut piffissaliussat nutaat saqqummiunneqarmata. Taakkua quarsaarlutillu kamaammernerat oqaatigisariaqarnerpara?
Tammajuitsussanik piniartitsisarnermut piffissaliussat nalinginnaasumik ukiut pingasukkaarlugit aalajangersarneqartarput. Piffissaq ukiunik pingasunik sivisussuseqartoq ukiut nikinneranni qaangiuppoq – aamma Aalisarnermut Piniarnermullu Naalakkersuisoqarfik ukioq manna marsimili nalunaarpoq, ukiut siuliinut sanilliullugu allannguisoqarnissaa naatsorsuutigineqanngitsoq.
Taamaakkuartoq piffissat piniarfiusussat nutaat aatsaat juulip 12-ani nalunaarutigineqarput – tamatumaanilu tammajuitsussanik piniartitsisartut quarsaarutigeqisaminnik paasivaat, Kangerlussuarmi nunataanilu siusinnerusumut sanilliullugu juulimi tammajuitsussanik piniartitsisoqassanngitsoq aalajangerneqarsimasoq.
Tamanna pivoq piffissami juulimi tammajuitsussanik piniartitsinissaq nungullugit tunineqareersimalersullu.
Allaaserisaq tamaat uani Sermitsiami atuaruk: