Tammajuitsussanik piniartitsisarnermi kanngunartuliaq ingerlaqqippoq

Kangerlussuarmi tammajuitsussanik piniartitsisartut taarsiivigineqarnissamik piumasaqaateqassagunik pitsaasumik suliassaateqarput, ingerlatsinermut tunngasunik immikkut ilisimasalik isumaqarpoq.

Amâsa Olsen nulii Rakel peqatigalugu suliffeqarfiutimini Polar Trophy Huntimi Kangerlussuarmi takornarianut nunanit allaneersunut tammajuitsussanik piniartitsisarnermik 2010-miilli aaqqissuussisarsimavoq. Juulip 20-ani piniariartussanik Tysklandimit tikittoqartussaasimagaluarput, tamannali piffissaq kingullerpaaq atorlugu taamaatiinnartariaqarsimallugu.

Naalakkersuisut Kangerlussuarmi juulimi tammajuitsussanik piniartitsinissamik piffissaq kingullerpaaq atorlugu tupannartumik taamaatitsinerannik kanngunartuliaq ingerlaqqippoq, aviisi Sermitsiaq allappoq.

Maanna suliaq Inatsisartuni aamma Qeqqata Kommuniani kommunalbestyrelsimi – immaqalu aamma eqqartuussivinni - suliarineqartussanngorpoq.

Sermitsiap suliaq inuiaqatigiinni ilisimatusartumut akuerisaasorujussuarmut issuarneqartorujussuusartumullu, cand. scient. pol.-imut aamma Ph.D.-mut Roger Buchimut, Aarhusimi Danmarks Medie- og Journalisthøjskolemi studielektoriusumut immikkoortortaqarfimmilu aqutsisuusumut, saqqummiuppaa.

Ingerlatsinermi ileqqunut pitsaasunut ilaanngilaq

Roger Buch suliamik isornartorsiuinermini ersarilluinnartumik oqaaseqarpoq, isumaqarlunilu ingerlatsinermi ileqqunut pitsaasunut akerliusoq:

– Suleriaaseq nalinginnaasoq tassaavoq, inatsisit maleruagassalluunniit akuersissutigineqarnermik imaluunniit tamanut saqqummiunneqarnermik kinggorna aatsaat sapaatip-akunneri qaammatilluunniit qassiugaluarnersut qaangiukkaanga atuutilersarlutik. Taamaattumik maleruagassanik juulimut atuuttussanik juulip 12-ani saqqummiussineq ingerlatsinermi ileqqunut pitsaasunut ilaanngilaq pissusissamissoornaniluunniit. Maleruagassat 2022-mi atuutilersinnissaat pissusissamisoorsimassagaluarpoq.

Roger Buch aamma isumaqarpoq, juulimi piniartitsinissamik taamaatitsineq ima annertutigisumik allannguutaasoq, tammajuitsussanik piniartitsisarnermik nalunaarut nutaamik tusarniaassutigineqarsimasariaqaraluarluni:

– Pingaartumik pissusissamisuunngilaq juulip piniartitsivittut atorunnaarsinnissaa tusarniaassutini oqaatigineqarsimanngimmat. Taamaattumik allannguutit innuttaasunit, maleruagassanut nutaanut piareersinaasimanngitsunit, tupaallaatigineqartorujussuupput. Allannguineq taama annertutigisoq tusarniaanermik nutaamik pilersitsisinnaasimasariaqaraluarpoq.

Taamaattumik Buch isumaqarpoq, tammajuitsussanik piniartitsisartut eqqugaasut annaasaminnut taarsigineqarsinnaanerannut periarfissanik misissuisoqassasoq:

– Taamaaliorluni aalajangiineq imaassinnaavoq unioqqutitsinerunngitsoq, kisianni innuttaasunik naapertuilluartumik pinninnerunngilaq. Taamaattumik sivikitsumik periarfissiilluni atuutilersitsinerup inatsisinut naapertuunnera misissorneqartariaqarpoq, innuttaasullu juulimi 2021-mi annaasaannut taarsiissuteqarnissamik akisussaaffeqarneq nalilersorneqarluni.

Allaaserisaq kanngunartuliamut tunngasoq tamaat uani Sermitsiami atuarsinnaavat:

Powered by Labrador CMS