Tamanut iluaqutaasumik aningaasanut inatsiseqarnissaa IA-mit ujartorneqarpoq

Aaqqissuusseqqinnissanut pilersaarutit qanoq kinguneqassappat?

Angallannermut aaqqissuusseqqinnissamut siunnersuut qanoq aningaasalerneqassava?

Aningaasaqarnermut ataatsimiititaliami ilaasortap Naaja Nathanielsenip IA-meersup Inatsisartuni tamanna apeqqutigaa. Aningaasanut inatsit 2016-moortoq pillugu Inatsisartut aappassaa eqqartuinerminni tamanna apeqqutigaa.

Tamanna pingasunngornermi eqqartorneqarpoq.

Ataqatigiinngitsut
- Aningaasanut inatsit ullut qulingiluat qaangiuppata taasissutigineqassaaq, taamaakkaluartoq siunnersuutit ataqatigiinngitsut arlaqarput, oqarpoq.

Aaqqissuusseqqinnerit sukkanerusumik suliarineqarnissaat Naaja Nathanielsenimit ujartorneqarpoq.

- Innuttaasut tamarmik timikkut tarnikkullu pitsaanerulernissaat, suliffissaqalernissaat, ilinniarnissaannut kajumissuseqalernissaat pitsaanerusumillu aningaasaqalernissaat sulissutigisussaavarput. Taamaattumik akileraarnermut, ineqarnermut innuttaasunillu sullissinernut aaqqissuusseqqinnerit aallartinneqartariaqarput, IA-mit politikkeri tikkuaavoq.

Akeqassaaq
Mittarfiliornissat, umiarsualivissat, innuttaasunut sullissinerit, akileraarutip appasinnerunissaa kiisalu tapiissutit allat tamarmik aningaasalerneqarnissaat akikitsuinnaanavianngitsoq oqaatigaa.

- Aningaasaqarnerput pitsaanerulissappat nunaniillu allanit aningaasaliisoqassappat uku pisariaqarput: inunnut sullissineq pitsaanerusoq politikkikkullu patajaassuseqarneq. Naalakkersuisut pitsaanerusumik Nunatsinnik aqutsilertariaqarput, Naaja Nathanielsen isornartorsiuivoq.

Siammasissumik isumaqatigiissutit
- Politikkikut siammasissumik isumaqatigiittoqartariaqarpoq, tassuuna suleqatigiittoqarnerulissaaq aamma paaseqatigiittoqarnerussaaq. Siunissaq eqqarsaatigalugu aalajangiisoqartariaqarpoq. Siammasissumik isumaqatigiinnikkut patajaassuseq takutinneqassaaq, tamanna Nunatta amigaatigaa, oqarpoq.