Tallimat ajugaaniutivissapput: Ilisimatusartoq kina saqqummiussillaqqinnerpaava?

Kina ilisimatusarnermi suliaminik paasiuminarnerpaamik saqqummiussisinnaava? Artic Hub Kalaallit Nunaanni ilisimatusartunik unammisitsivoq. Ajugaaniutivittussat tallimat toqqarneqarsimalerput, taakkulu ilisimatusarnerminni angusaminnik saqqummiussillaqqinniuutissallutik.

-ip unammisitsinerani Paasisavummi, ilisimatusartut saqqummiussillaqqinneqqisaatsinnerani peqataasussatut toqqarneqarsimasut tallimat aajuku. Ajugaasoq 25.000 koruuninnassaaq. Arctic Hub

- Ukiut 50-it matuma siornatigut Kalaallit Nunaanni 2-diabetesimik nappaateqartoqartarnera qaqutigoortupilussuuvoq. Nappaatinik tuniluuttartunik qaittukkut misissuisoqarmat Canadami Alaskamilu inunnut allanut sanilliullugit kalaallit sukkornermik nappaateqarnerusut paasineqarsimavoq.

Kalaallit Nunaanni sukkornermik nappaateqartarneq pillugu ilisimatusarsimanerup nutaajunerusup allaaserineqarnera taamatut aallartippoq. Kalaallit Nunaanni ilisimatusaatigineqartut pillugit ilisimatusartunit allaaserineqartartut ilaannikkooriarlutik ima paasiuminaattartigaat, allaat innuttaasunit paasineqarsinnaanatik.

Arctic Hub-ip tamanna allanngortikkusuppaat, Paasisavullu pillugit unammisitsinerani ilisimatusartut saqqummiussisarnerminni paasinarnerusumik saqqummiussisinnaanermut periarfissillugit.

Arctic Hub-imi naliliisartut maanna unammisitisinermi peqataasut tunniussaat suliarsimalerpaat, ajugaaniutivittussallu tallimat toqqarsimallugit:

- Ilisimatusartut ilisimasaminnik paasisimasaminnillu innuttaasunut ingerlatitseqqikkusuttut taama amerlatiginerat takullugu nuanneqaaq. Maanna neriuppugut ajugaaniuteqataasut tallimat ilisimasaminnik inunnut sapinngisamik amerlanerpaanut ingerlatitseqqiinissaminnut Paasisavut iluaqutigisinnaassagaat,”Anna-Sofie Skjervedal, Arctic Hubip allattoqarfiani pisortaq oqarpoq.

Takornariartaatinik nungusaataanngitsumik takornariartitsisarneq isigiarsuttuunerlu

2023-mi martsip aallaqqaataani toqqaannartumik aallakaatitsinermi ilisimatusartoq angusaminik oqaluttuallaqqinnerpaaq ajugaatinneqassaaq. Ajugaasoq Brugsenip aningaasaliissutaanik 25.000 koruuniusunik akissarsitinneqassaaq, Arctic Hub-imit ilisimatitsipput.

Ajugaaniutivittussat tallimat ukuupput:

  • Laura Helene Rasmussen, kvælstoffip aasaanerani ukiuuneranilu masarsummi maanna ineriartorneranik siunissamilu ineriartornissaanik misissuivoq.
  • Liz Cooper, Kalaallit Nunaanni takornariartaatinik nungusaataanngitsumik takornariartitsisarneq aamma takornariat nunaqavissullu suleqatigiilluarnerulersinneqarsinnaanersut pillugit misissuivoq.
  • Naja Carina Steenholdt, Kalaallit Nunaanni pitsaasumik inuuneqarneq aamma inuiaqatigiit atugarissaarnerup tungaatigut arlalinnik ajornartorsiuteqarfiusut sooq aamma qanoq naammagisimaarneqarsinnaallutillu allaat iluarisimaarneqarsinnaanerannik misissuivoq.
  • Nick Duelund, kalaallit meerartaasa isigiarsuttuunerannik aamma meeqqat isigisaannik misissuisarnissaq kingornalu isigisaqarsinnaaqqilernissamut pisariaqartunik iluaqutissinneqarnissaat Kalaallit Nunaata qanoq qulakkeerinnissinnaaneranik misissuivoq.
  • Ulunnguaq Markussen, Tasiilap illoqarfianik ineriartortitsinermik aamma illoqarfimmi nunaqarfimmiluunniit pitsaanerpaamik qanoq ineriartortitsisoqarsinnaaneranik misissuivoq.
Powered by Labrador CMS