Talittarfiup imartaa ikkappallaarmat takornariartaatit talittussat taamaatiinnarneqarsinnaasut
Takornariartaatit nunatsinnut talittussat ukioq manna aatsaat taama amerlatigaat. Kangerlussuarmili talittarfiup periarfissalunnera pissutigalugu takornariartaatinut ilaasussanik sulisunillu paarlaassinerit 50-it taamaatiinnarneqartariaqalersinnaapput.
Takornariartaatit nunatsinni illoqarfinnut ulluni makkunani talittut aatsaat taama amerlatigaat. Takornarialerinermi suliassaaleqisoqanngilaq, illoqarfiimmi arlallit maanna tikerarneqarput. Takornariartaatit nunatsinnut ukiuni marlunni kingullerni talissimanngereerlutik, ukioq manna aatsaat taama tikerartigissapput.
Ajornartorsiuteqartussaanerali Arctic Circle Businessip maanna maluginiaqquaa.
Takornariartaatinut ilaasussat sulisullu Kangerlussuarmi talittarfimmi paarlaannissaat 50-t tungaannoortut kinguaatsuunngikkunik taamaatiinnartariaqalersinnaapput.
Arctic Circle Business tusagassiorfinnut nalunaaruteqarluni taama allappoq.
- Ajoraluartumilli aasaq manna turnarounds-it 50-it tungaanut taamaatiinnarneqaratarsinnaapput, imaluunniit kinguaattoorlutik. Tamanna peqquteqarpoq Kangerlussuup talittarfiata imartaata itissusaa, ikkappallaarmat, tamannalu suliarineqarsimanani, Arctic Circle Business taama allappoq.
Killiffik ajuusaarnartoq
Sermersuup aannerani kuuk Kangerlussuup talittarfianut kuuttoq sioqqanik nassataqartarpoq, talittarfillu sioraqarnerulertilluni 2 miiterisut ikkatsigilertarluni. Takornariartaatit Kangerlussuup talittarfianut talissinnaassappata talittarfiup imartaa sioraajarneqartariaqartarpoq. Maannamulli suli sioraajaasoqarsimanngilaq, Kangerlussuarmullu takornariat tikerartut takornariartaatinut ikisarnissaat ajornartorsiutaalersinnaavoq.
ACB-mi pisortaanerup killiffik ajuusaarnartutut isigaa.
- Pisup kingunerisaanik suliatsinnik iluamik ilisimasaqanngitsutut takornariartaatsilerinermut tunngatillugu uggornaqaaq, aammalu tikeraat migisaqarluanngitsoornissaat takornarialerisullu tamakkiisumik tulannerit iluanaarfiginissaannut periarfissaqanngitsuussapput, ACB-mi pisortaaneq Jesper Schrøder oqarpoq nangillunilu:
Ataatsimoorluni akisussaaffik
- Nunatsinni takornarialerinermut ineriartorneq ataatsimut akisussaaffigaarput, taamaammat suliassat imaattut pingaartinneqartartussaapput, taamaattoq suliassap pingaassusaanik paatsoornermik aammalu attaveqatigiinnerlunnermik kingunilimmik naapinneqarpugut, oqarpoq.
Namminersorlutik Oqartussani Renoveringsstyrelsep sioraajaanissaq suliarisarpaa. Qeqqata Kommuniata takornariartaatit talissinnaanissaat pillugu suliassaqartoq 2019-imili ilisimatitsissutigisarsimavaa. Maannamulli suli sioraajaasoqanngilaq, takornarialerinerlu ukioq manna annertuumik eqqorneqaratarsinnaasoq, ACB ilisimatitsivoq.
Takornariartaatinut ilaasut sulisullu paarlaattussanngoraangata Kangerlussuarmi talittarfimmi prammit gummibådillu atorneqartariaqartarput, paarlaassinerli eqaannerussagaluarpoq talittarfiup imartaa sioraajarneqarsinnaasuuppat, Jesper Schrøder ilisimatitsivoq.