Nuuk

Talermilluni illoqarfimmi unammiuaarneq siulleq

Nuuk Fitness Armwrestling Cup arfininngormat ingerlanneqarpoq, katillugulu unammisartunik 19-inik peqataaffigineqarluni

Talermilluni illoqarfimmi unammiuaartitsineq aatsaat siullermeerluni arfininngormat ingerlanneqarpoq.

Unammisaqattaarnermi peqataasut 19-iupput, ilaatigut talerpimmittartut timersoqatigiiffiannit nutaamit Team Armwrestling Nuummeersut aammalu aaqqissuisut, Nanoq Pullers.

Unammiuaartitsineq dommilerluni aamma nunat tamalaani malittarisassat naapertorlugit ingerlanneqarpoq, aaqqissuisullu aamma unammisitsinerminnit ilikkagaqarluarput.

Atuaruk: Pakassummittartoq VM-imi peqataarngaartoq

Unamminerit assigiinngitsut
Unammisaqattaarnerit assigiinngitsunut tallimanut avinneqarput. Unamminerit siullerni inuusuttut 18-it ataallugit ukiullit unammipput, tassanilu unamminerit naligiiffiupput Maasinnguaq Boye U18 gruppimi ajugaavoq, Eli Sørensen ajugaasup tulleraa, Qillaq Didriksen pingajuuvoq.

Unamminerit aappaanni arnat pingasut unammipput, tassani Nivinnguaq Egede saamimmik talerminnermi ajugaavoq, talerpimmillu Lena Kielsen ajugaavoq.

Gruppit pingajuanni inersimasut 85 kilo ataallugu oqimaassusilli unammipput, saamimmillu ajugaasup Mikkel Andersenip aamma talerpimmik ajugaasup Benjamin Noahsen, kiisalu Malik Motzfeldt ajugaasup talerpimmik tulliata unamminerat naligiiffiupput.

Gruppit sisamaanni inersimasut 85 kilo sinnerlugu oqimaassusillit unammipput. Minik Johansen siorna nunarsuarmi pissartanngorniunnermi peqataasoq, tamani ajugaallualaavippoq. Jan Heilmann ajugaasup tulleraa, Kuno Fenckerilu pingajuuvoq.

Tamarmik imminnut unammisut
Naggataatigut 'over-all'-imi unammisoqarpoq, unammisut tamarmik imminnut unammillutik. Tupaallannanngitsumik Minik Johansenip tallit tamaasa ajugaaffigai, Mikkel Andersen ajugaasup tulleraa, saamimmik unamminermi Benjamin Noahsen pingajuuvoq, talerpimmillu Malik Motzfeldt pingajuulluni.

Powered by Labrador CMS