Takutitassiaq sakkortooq TikTok aqqutigalugu siammarterneqartoq
Inuit attaveqaqatigiittarfiata TikTok-ip video angummik imminortumik takutitsisoq peerniarlugu sulissutigaa. Takutitassiaq Facebook aqqutigalugu takuneqarsinnaavoq.
Angajoqqaat ernumassuteqartut arlallit, inuit attaveqaqatigiittarfiat nuannarineqaqisoq TikTok pillugu Facebookikkut piffissami kingullermi mianersoqqutsigaat.
Video imminortumik takutitsisoq app-imik atuisut piaarinaatsoornikkut takusinnaasaat mianersoqqutigineqarpoq. Angajoqqaat takutitassiaq angajoqqaanut allanut mianersoqqutigaat, meeqqat inuusuttullu app-imik tassannga nuannarisaqarnerat pissutigalugu.
Video Facbookikkut saqqummiunneqarsimavoq, aamma Twitter Instagramilu aqqutigalugit saqqummiunneqarsimalluni. Tuluit Nunaannit tusagassiorfik BBC allappoq.
Kontut mattunneqarniartut
TikTok-ip BBC-mut oqaatigaa, kontut takutitassiamik TikTok-ikkut saqqummiisimasut mattunneqarniartut. Aamma takutitassiap peerneqarnissaa sulissutigineqartoq:
- Atortorissaarutitta nammineerlutik takutitassiat imminortarnermik nersorinninnermik siammarteriniarnermillu takutitsisinnaaut pillugit politikkitsinnik unioqqutitsisut nalunaarsorlugillu ilisarnaasertarpai, TikTok sinnerlugu oqaaseqartoq BBC-mut oqarpoq, nangillunilu:
- Ilaasortatta takutitassiap imaanik nalunaarutiginnissimanerat, inummillu pineqartumik taassumalu ilaqutaanik ataqqinnillutik videonik taamak ittunik takusaqarnissamut avitseqateqarnissamullu mianersoqqusinerat pingaartilluinnarparput.
BBC naapertorlugu, video imminortumik takutitsisoq Facebookikkut saqqummiuneqarsimavoq. Facebookip BBC-mut ilisimatitsissutigisimavaa, video qaammammi kingullermi ullormi saqqummiunneqarfiani peerneqarsimasoq.
Qeqqata Kommuniata siusinnerusukkut angajoqqaanut mianersoqqutigisimavaa, meeqqat TikTok-imik atuisartut videomik nuanninngitsumik takusaqarsinnaanerat.
Tusaannga eqqaamallugu
Meeqqat, inuusuttut angajoqqaallu tamarmik arlaannik oqaloqateqarnissamik allaqateqarnissamillu pisariaqartitsisut Tusaannga attavigisinnaavaat.
Tusaannga ammsarpoq:
Ulluinnarni nal. 9:00 – 22:00 (ataasinngornermiit sisamanngornermut)
Weekendini nal. 16:00 – 04:00 (tallimanngorneq arfininngornerlu) aamma
Sapaammi nal. 16:00 – 22:00