Takuteqqaarneqalersoq: Imminut toqunnissamut pinaveersaartitsinermut inuusuttut isumaat saqqummiunneqassasut
Qamani, inuusuttut imminut toqunnissamut pinaveersaartitsinermut isummersuutaat oqariartuutaallu pillugit filmiliaq, unnugu takuteqqaarneqassaaq kingornalu oqallitsitsisoqassalluni. MIO suliniummik ingerlatsisuuvoq.
Inuusuttut arlaqartut imminut toqunnissamik eqqarsaateqartartut misissuinerit takutippaat, Kalaallit Nunaannilu Politiit ukiumut nalunaarusiaanni aamma atuarneqarsinnaavoq inuusuttut ukiut tamaasa arlallit imminut toqoriartartut.
Imminulli toqunnissap pinaveersaartinnissaanut suliniutini inuit sullissisut suliami peqataasarput, inuusuttulli isumaat ilaatinneqassanatik. Tamanna allanngortittariaqartoq, meeqqat pisinnaatitaaffii pillugit sullissivik, MIO isumaqarpoq.
MIO suliniummik suliaqarsimavoq, imminut toqunnissamik pinaveersaartitsinermi inuusuttut isumaat ilanngunneqaqqullugit. Naalakkersuisummi imminut toqunnissamut pinaveersaartitsinermik suliaqarput, periusissiorlutik.
Filmi Qamani, inuusuttut isummersuutaannik oqariartuutaannillu imaqartoq, Katuami unnugu nal. 19.00 takuteqqaarneqassaaq, kingornalu oqallittoqassalluni.
Filmip takuteqqaarneqarnissaanut politikerit susassaqartut MIO-mit aamma qaaqquneqarsimapput.
Inuusuttut arlallit peqataasut
Suliniutip ingerlannerani kommunini arlalinnit inuusuttut arlallit peqataatinneqarput. Inuusuttut Kommuneqarfik Sermersuumit, Avannaata Kommunianit aamma Kommune Kujallermit oqariartuuteqartinneqarput.
MIO kommunini assigiinngitsuni sammisaqartitsisimavoq, inuusuttut oqariartuutaat kissaataallu katersorniarlugit.
Meeqqat, inuusuttut ilaqutariinnullu Naalakkersuisoq, Mimi Karlsen siusinnerusukkut oqarpoq imminut toqunnissamut akiuiniarnermi periusissiorneq unitsinneqarallartoq, inuusuttut isumaat tusarneqaqqaassammata, filmillu Qamani-p takuteqqaarneqareernerata kingorna Naalakkersuisut suliaqarnerat nangeqqissasoq.
Qamani pillugu tunuliaqutaasumik nalunaarusiornermi MIO-p oqariartuutigaa pinaveersaartitsinermi pineqartut peqataatinneqartinnagit paasissutissat amigartartut. Tarnikkut katsorsartinnermi neqeroorutit taakkulu pitsaassusaat pillugit inuusuttut isumaat naammattumik pigineqanngilaq. Soorluttaaq inuusuttut qaqugukkut ikiortissarsiortarnersut, soorlu ikiortissarsiorusuttannginnersut paasissutissatigut pigineqarani. Taamatuttaaq meeqqat inuusuttullu inuunerat pineqartillugu isumaat tusarneqartariaqartoq, MIO-p oqariartuutigereerpaa.