Takuiuk? Innerinnaap nakkartup Nuuk qulaakkaa

Nuuk ataasinngornerup unnukkut qorsorpaluttumik tungujortumillu qaammarfigiterujussuarpoq. Innerinnaap nakkartup Nuuk ataasinngornermi unnukkut arfineq-marlunngorluinnalersoq qulaappaa.

Innerinnaq nakkartoq pamiuusalik Nuuk qulaappaa, illoqarfillu qorsorpaluttumik tungujortumillu qalipanneqartutut ippoq. Nuummi innuttaasut arlallit innerinnarmik qulaassisumik takunnipput.

Innuttaasut arlallit Facebookikkut attaveqatigiittarfinni oqaluttuarlutik allapput nalunaaqutaq 18:56 titaraalu innerinnaq kujataata tungaanut nakkartoq takusimallugu.

GEUS Sermitsiaq.AG-mut ilisimatitsivoq qanngorpallammik nunalluunniit sajuppillanneranik tunngassuteqartumik saaffigineqarsimanatik. Innerinnaap nakkarneranut atatillugu Nuup eqqaani nunap sajussimasinnaaneranik GEUS aamma nalunaarsuisimanngilaq, tamannalu isumaqarsinnaavoq innerinnaq nakkartoq pujoralaasaannaasimasoq imaluunniit ujarassuit nunamut tunnginnerminni aassimasut.

- Innerinnaq nakkartoq pillugu ilisimasatuagut nittartakkani attaveqatigiittarfinni pissarsiaraagut, tassa assilineqarsimagami. Nunap sajunneranut uuttuutigut nunap sajussimasinnaaneranik uuttuisimanngillat, taamaammat ilimanarsinnaavoq meteoriusimassaguni meteorit nunamut tunnginnerani ujarattarsui aassimassasut, imaluunniit pujoralaasaannaq qulaaqqussimassasoq, Trine Dahl Jensen GEUS-imi seismologi ilisimatitsivoq.

GEUS ilisimatitsivoq innuttaasut qanngorpallammik tusagaqarsimasut nunalluunniit sajunneranik maluginiagaqarsimasut saaffiginnissinnaasut. Innuttaasut maluginiagaqarsimasut ildkugle.dk-mut nalunaarutiginnissinnaapput.

GEUS Nuup eqqaani nunap sajunneranut uuttuisartunik uuttuuteqarpoq. Uuttuutillu allat Nuummut qaninnerusut Kangerlussuarmi Ivittuunilu inissisimapput, taakkulu tamarmik nunap sajunneranik ippassaq uuttuisimanngillat.

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS