Ilulissat
Takornarissat Hotel Arcticimi unnuisartut amerlatsikkiartuinnavissut
Aningaasaqarnikkut 2008-mi ajalasoortoqarnera pissutaalluni hotelimi unnuisartut 2009-mi appariaraluarput, maannakkulli aatsaat taama hoteli Ilulissaniittoq angusarissaartigaaq
Hotel Arcticip ataatsimeersuarnerani pisortap Erik Bjerregaardip nalunaarutigaa takornarissat hotelimi unnuisartut amerleriaateqarsimasut, kiisalu aamma naatsorsuutit aatsaat taama sinneqartoorfiutigisut siulersuisunut ilaasortanut saqqummiunneqarlutik.
Ukiut marluk ingerlaneranni hotelimi unnuisartut 36 procentimik qaffariaateqarsimasut nalunaarutigineqarpoq - 2011-mit naatsorsuinermut aallartittumit.
Hotel Arcticip oqaluttuarisaanerani aatsaat taama hotelimi takornariaqartigaaq, Erik Bjerregaard nalunaarpoq.
Takornarialerineq ineriartortoq
- 2008-mi aningaasatigut ajalasoornerup pissutigisaanik 2009-mi takornarissat ikileriarput, tuniniaanerli annertusineqarmat tamanna mumisinneqarsinnaasimavoq. Maannakkullu nalunaarutigisinnaanngorparput ukiumi 2013-mi aatsaat taama ingerlalluartigigatta, 2008-mit 20 procentimik angusarissaarnerulluta. Illoqarfimmut Ilulissanut tamanna tulluusimaarutissaavoq, tassami ukiup ilaani angallaffiunngitsumi ineriartortitsisoqarsimavoq, tassa juuni tikitsinnagu kiisalu oktobari qaangerlugu annertunerusumik ineriartortitsisoqarluni, Erik Bjerregaard oqarpoq.
- Takornariaqarnerup tungaatigut ineriartortitsisoqarneratigut timmisartukkut angallannermi aamma amerlanerusunik ilaasoqartalerpoq. Islandimit Ilulissaliarneq ukiut sisamassaa ingerlavoq. Aamma Air Greenlandip timmisartuutaa Airbus amerlanerusunik ilaasoqarsinnaanera malunneeqataavoq. Nunanit allaneersut amerlanerit Islandikkoorlutik tikittalernikuupput, tamannalu Ilulissani malugineqarsinnaalluni, Hotel Arcticip pisortaa oqarpoq
Missingersuut saqqummiunneqarumaarpoq
- Takornarialerinermi ineriartortitsisoqarnera pissutaalluni suliffeqarfiit allat aamma takornarialerinermik ingerlataqartut siuariarsimallutik nalunaarutigisarpaat, Erik Bjerregaard oqarpoq.
Air Greenlandip aningaasatigut missingersuutini saqqummiutereerpagit hotelip missingersuutini aamma saqqummiukkumaarai oqaatigineqarpoq, tamannalu martsip qeqqata missaani piumaartoq nalunaarutigineqarpoq.