Takornariat soqutiginnilernissaat anguniarlugu aningaasaliisoqartariaqarpoq
mittarfissat nutaat ammarpata Kalaallit Nunaannut tikeraarusuttunut neqeroorutit atortorissaarutillu amerlanerusut sulissutiginissaat pisariaqartinneqartoq Visit Greenland aamma Kalaallit Airports isumaqarput.
Sapaatip akunnerata siuliani Europami silaannakkut angallannermut nuisitsineq annertooq Routes Europe 2022 Bergen-imi ingerlanneqarpoq, aammalu neriulluarnartumik isummersimaarneq Visit Greenlandip aamma Kalaallit Airportsip tamarmik tupaallaatigaat.
- Ukiuni kingullerni marlussunni isummertarneq Routes-imi suliap pissusissamisoornerani malunnannginnerusimavoq. Kisianni ukioq manna pimoorullugu neriulluartoqaqqilersimasoq malugineqarsinnaavoq, aammalu Covid-19-ip siornatigut pisartutut peqataasut amerlatigalutik, Kalaallit Airportsimi pisortaaneq Jens Lauridsen tusagassiutinut nalunaarummi oqarpoq.
Mittarfiit tallineqarnissaat eqqumaffigineqarpoq
Timmisartuutileqatigiiffiit akornanni Kalaallit Nunaata ornigassatut siunissaqarnera annertoorujussuarmik eqqumaffigineqartoq nammineq aammalu Visit Greenlandimi Head of PR Tanny Por-ip malugaat.
- Europami aammalu amerikap nunavittaani timmisartuutileqatigiiffiit 17-it pisortatigoortumik ataatsimiinneranni Visit Greenland aamma Kalaallit Airports peqatigiillutik peqataapput. Kalaallit Nunaanni marlunnik nunanit tamalaaneersunut mittarfeqalertussaasoq, aammalu tamanna siunissami pissanganartunik qanoq periarfissaqalersitsisussaasoq, nunanit allaneersut eqqumaffigisorujussuugaat qularutissaanngilluinnarpoq, Tanny Por oqarpoq.
- Kisianni angallavinnik ineriartortitsinermut tunngatillugu unammilleqatigiinneq annertoorujussuuvoq, ornigassarpassuit pilerigineqarput – aammalu Kalaallit Nunaata ornigassatut asseqannginerata takorloorneqarnerinnaa timmisartumik angallavinnut pilerilersitsisinnaanngilaq. Annertunerusunik pisoqartariaqarpoq, aammalu niuernertut aamma ingerlanneqartussaavoq, Jens Lauridsen nangippoq.
Ineriartortitsisoqartariaqartoq
Taamaattumik suliassaqarfippassuarni, ornigassanik timmisartuutileqatigiiffinnik takornarianillu amerlanerusunik tikisitsinissamut piareersimalersitsisinnaasuni, aningaasaliinissaq pisariaqartinneqarpoq. Nunarput tamakkerlugu akunnittarfinni, neriniartarfinni misigisassarsiornermullu atortorissaarutit ineriartortinneqartussaapput. Aamma takornariartitsisarnerup ineriartortinneqarnerata Kalaallit Nunaat tamakkerlugu iluaqutaalernissaata qulakkeernissaanut, nittarsaassinermik suliniuteqarneq ataqatigiissaarneqartussaavoq.
Piujuartitsiviusumik takornarialerineq
- Kalaallit Nunaanni ornigassat arlallit piffissani aalajangersimasuni pisinnaasatigut unammilligassaqareersut misigineqarpoq, tamannalu unnuisarfinni, neriniartarfinni misigisassarsiornernillu neqeroorutini pivoq. Taamaattumik takornariartitsinermik inuussutissarsiornerup annertunerusumik ineriartortinneqarnissaata uumarissarnissaa, tamatumalu piujuartitsiviusumik aammalu nunap immikkoortuini ornigassani aqutsinermi suliffeqarfiit aammalu inuiaqatigiit nalinginnaasumik, suleqatigalugit pinissaa, Visit Greenlandimi annertoorujussuarmik ukkataraarput, Tanny Por oqarpoq.
Taamaattoq ileqquusumik takornariarpassuit eqqarsaatigineqartarnerannut taarsiullugu piujuartitsiviusumik misigisassarsiortitsilluni takornariartitsisarnerup salliutinneqarnissaa pisariaqartinneqartoq, taakkua tamarmik erseqqissarpaat – taamaalilluni ineriartorneq Kalaallit Nunaanni innuttaasut pinngortitarlu malinnaasinnaalerlugit pissalluni.