Takornariat nakorsiarusuttorpassuit: Nakorsaq innuttaasorlu tamarmik ernumapput
Peqqinnissaqarfik nunatsinni innuttaasunik sullissinissaminut assassaaleqiffiuvoq. Pingaartumik nakorsat peqqissaasullu amigaataammata pissutsit taamaapput. Taamaattorli takornariarpassuit, pingaartumik umiarsuat takornariartaatit aqqutigalugit nunatsinniittartut peqqinnissaqarfimmit sullinneqartariaqalersut amerliartuinnarput.
Takornariat nunatsinniinnerini annaassiniarluni angallassinerit piffissami kingullermi amerliartorput. Peqqinnissaqarfipput sulisussaaleqereeqisoq taamaalilluni suli annertunerusumik artukkerneqarpoq, tassa takornariat tusintilikaat sinerissami illoqarfinnut nunaqarfinnullu talikkaangata nakorsamit sullinneqarnissaminnik pisariaqartitsisut amerlartuinnarmata.
Taamak ineriartortoqarnera assut ernumalersitsivoq. Ilaatigut nakorsaq Dronning Ingridip Napparsimavissuani atorfeqartoq ernumassuteqarpoq, pingaartumik umiarsuit takornariartaatit ilaaffigalugit nunatsinnut tikittartut nakorsanit sullinneqarnissaminnik pisariaqartitsisut taamak amerlatigimmata:
- Peqqinnissaqarfimmi nakorsaqatigiit akornatsinni umiarsuarsuit taasarpagut "utoqqaat illui immami puttasut". Takornarissat ilarpassui takkuttarput nappaaterpassuaqareerlutik, taakkunanngali arlalissuit aamma Nunatsinni sullinneqartariaqalersarput ajutoorlutik naggussamikkullu napisoorlutik imaluunniit aamma aanaartoorlutik milittoorlutilluunniit.
- Arlalippassuartigut toqukkut qimaguttoqarsinnaanera allaallumi qimaguttoqartarnera nalaattarparput, nakorsaq Facebookimini inuttut isummersorluni oqaluttuarpoq.
Nakorsamik atorfissaqartitsisartut taamannaapput
- Takornariat umiarsuarniit napparsimavinnut aasassanngortinneqartartut amerliartuinnarput, tamatuma malitsigisaanik nunatsinni najugaqartut napparsimaviliaanneqartussallu utaqqisinneqartariaqartalerlutik. Tamannaannaanngilarli, tassami umiarsuarsuit takornariartaatit nunamut talikkaangamik, ilaasorpassui nakorsiartarput, taakkunanngalu takornariat arlalissuit napparsimavinnut nakorsiartarput, allaat aamma unitsinneqartariaqartartut amerliartorlutik, taamaalillutik aamma nunaqavissut utaqqereersut suli aamma utaqqisinneqartalerlutik.
Nakorsaq naggataatigut apeqqusiivoq sooq oqartussaasut pissutsit taamaalinerannut akuersaaginnarnersut, uffa peqqinnissaqarfik annertoorujussuarmik tamaviaartitaareersoq, allaallu Nuup avatanni nakorsat aalajangersimasumik atorfillit sisamaannaasut peqqinnissaqarfimmilu sulisussameerneq taamak annertutigisoq.
Aaqqissuisoqarfimmit kisitsinik utaqqivugut, takornariat ukioq manna nunatsinniittut akornanni nakorsamik atorfissaqartitsisartut aammalu pilertortumik napparsimaviliaanneqartariaqartartut pillugit paasissutissanik pissarsiniarluta.
Innuttaasoq Aviâja Egede Lynge: Nunatsinnut iluaqutaanngillat
Innuttaasoq Aviâja Egede Lynge ulluinnarni meeqqat oqaaseqartartuattut ilisimaneqarneruvoq, taannali aamma takornariaqarnerup iluani ilinniagaqarpoq, inuttullu isummersuummini takornariarpassuit umiarsuit takornariartaatsit ilaaffigalugit nunatsinnut tikittartut pillugit assut ernumassuteqarpoq:
- Takornariartaassuit nunatsinnut kingunerluutai ernumagilluinnarpakka; Qaanaami qilalugarniarfinnut pulasarput, tunumi qilalugaqarfinnut pulasarput, innuttassut nakorsanik ikiortissinnaanissaminnut erloqereersut, umiarsuarni ilaasut napparsimaveqarfipput atoraluttuinnarpaat, umiarsuillu mingutsitsisarlutik. Nunatsinnilu aningaasat qanoq annikitsigisut ilisarpaat?
- Piujuartitsinissamik tunngaveqarluni ingerlatsinerunngilluinnarpoq. Naak nunatta taanna qulakkeerniarlugu aalajangiinikuugaluartoq. Nammineq takornarialerinermi aqutsinermi Bacheloreqarpunga, tassanilu piujuartitsinissaq sammisarinikuullugu, maannalu ineriartorneq piujuartitsinissamik tunngaveqarluni ingerlatsinerunngilaq, Aviâja Egede Lynge tikkuaavoq.
Aaqqissuisoqarfimmit nakorsaaneqarfik oqaaseqartinniarlugu sulissutigaarput.
