Ukiuni arlalinni ajornartorsiortoqareersoq naatsorsuutitigullu peqquserluttuliortoqarsimaneranik pisut annertuut pe­reersullugu KNI ingerlalluarpoq, taannalu ukiumi naatsorsuusiorfiusumi 2022/22-mi ukiup affaani 172 millioner koruuninik sinneqartooruteqarpoq. Angusat kaaviiaartitanit 1.603 millioner koruuninit pilersinneqarsimapput, taakkualu ukiup affaanut kingullermut sanilliullutik 362 millioner koruuninik qaffariaateqarsimapput. KNI-p ukiumi naatsorsuusiorfiusumi 2021/22-mi tamarmiusumi kaaviiaartitai 2.444 millioner koruuniupput.

Taama aviisi Sermitsiaq allappoq.

– Angusat pitsaasut pingaartumik Polaroilip umiarsuarnut takornariartaatinut bunkeroliemik tunisaqarluarsimaneranik kiisalu Pilersuisumi aamma KNI Engrosimi nioqqutissat tunineqartut amerleriarsimanerannik pissuteqarpoq, pisortaaneq Jeppe Jensen, Sermitsiamut oqarpoq.

– Coronap kingorna ukiumi takornariaqarnerup ingerlalluartorujussuusimanera malugilluarsinnaavarput, tamannalu naatsorsuutitigut angusanut sunniussimavoq.

– Ukiup affaanut naatsorsuutit aamma soqutiginaateqarpoq, saliinerup kanngunartuliallu kingorna taakkua angusanik naatsorsuinitta siullersarimmatigit. Tamatumani takutinneqarpoq, suliffeqarfipput maanna peqqissuusoq, siumut eqqortumik ingerlasoq.

KNI ukiut naatsorsuusiorfiusut siuliini marlunni koruunit milliardip ataatsip affangajaanik naatsorsuutitigut iluarsiissuteqartariaqarsimavoq, aqutsisuusimasut uninngasuutinik kukkusumik naatsorsuisimanerat pissutigalugu, tamannalu pilersuinermik suliffeqarfimmi Namminersorlutik Oqartussat pigisaanni aningaasaqarnermut nungullarsaataasimavoq.

Iluarsaassinissamik pilersaarutit

– Tamakkuali tamaasa maanna qaangersimavavut, siumullu isigisinnaanngorsimalluta. Angusat pitsaasut ilaatigut tankeqarfinnik, pisiniarfinnik quersuarnilli iluarsaassinermut atorneqassapput, Jensen oqarpoq.

Allaaserisaq tamaat Sermitsiami sapaatip-akunnerani saqqummersumi atuaruk, uani:

Sermitsiaq - 20/01-2023

Klik her for at læse