Takornariat innarluutillit Nunatsinni ilungersunartorsiortartut
Qallunaat nuliariit nulia pitsorluttuusoq, angalanertik iluatsinngitsoortoq pillugu taarsiiffigineqarput
Angalanermik tamakkiisumik aaqqissuussisarnernut maalaaruteqartarfiup qallunaat nuliariit, nulia pitsorluttuusoq, Kujataanut siorna angalanerannut atatillugu taarsiiffigitittussanngortippai.
Nuliariit nuliaasup innarluuteqarnera angalanermik aaqqissuussisumut Topas Travelimut erseqqissumik nassuiaatigaat. Nuliaasup nunakkut manissukkut takinerpaamik kilometeri ataaseq pisussinnaavaa, angalatitseqatigiiffiulli angalanissaat nuliata pisinnaasaannut naleqqussarneqassasoq neriorsuutigalugu, Sermitsiaq allappoq.
Taamaakkaluartoq Kujataani ”Nunarsuarmiunut kingornussassanngortitamut & Puilasumut kissartumut” angalanerat nuliariinnut pakatsinartuuvoq, tassami angalanerat ilaatigut akunnittarfimmiinnermik aamma angallammik angalaarnermik ilaqartussaq pilersaarutit naapertorlugit pisimanngimmat.
Piareersimaffigineqanngilaq
Angalanermik tamakkiisumik aaqqissuussisarnernut maalaaruteqartarfiup aalajangiinera soqutiginartuuvoq, piffissamimi matumani Nunatsinnit takornariat aningaasaateqarnerusut siunnerfigineqarnissaat aalajangiunneqarmat. Taama takornariartartut ukioqqortunerusarput taamaalillutillu soorlu inuusunnerusunit nammattagaqarlutik takornariartartunit timimikkut innarluuteqarnerusarlutik.
- Kalaallit Nunaat takornarianik innarluutilinnik isumaginnissinnaanissaminut piareersimava?
- Naamik, takornariat qanoq ikkaluartulluunniit isumagisinnaanissaat piareersimaffiginngilarput, innarluutillit illersuisuat Christina Johnsen Sermitsiamut oqarpoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: