Takornariat Ilulissani ukiortaarsiussasut
Ilulissani ukioq kaajallallugu takornariaqartaleriartorpoq.Hotel Arctic ukioq manna ukiutoqqami 100-nikunnuisoqassaaq.
I lulissani takornariaqarneq ingerlalluarpoq. Ukiup annersaani illoqarfiup unnuisarfiini inissarsinissaq ajornakusoorluinnangajappoq. Hotel Arcticip ukiup aappassaa takornariat ukiortaarsioriarniat unnuisarfissaqarnissaat isumagaat.
– Juullikkunni sulinngiffeqarnissaq ukioq manna sivikissaaq. Sapaassuarni matoqqariarlugit decembarip 27-ani ammaqqeriissaagut, Hotel Arcticip pisortaa Morten Nielsen Sermitsiamut oqarpoq.
Kingulliunngitsumik ammasut
– Siorna juullip ukiutoqqallu akornanni ammatitsinerput siullerpaamik misilipparput – taamani ukiortaami 70-inik unnuisoqarpugut. Iluatsilluarmat tamaalioqqikkusussimavugut, taamaammat ukioq manna ammaqqissalluta.
– Ukiortaami festertitsinissarput ingasassaqaaq. Hunnorujunik pulaartoqassaagut. Tikittussat marlunnut avissimapput, siulliit decembarip 27-ani tikikkuni aappaat 30-ani tikissapput. Taakkulu tamarmik januaaripaappaani aallaqqissapput.
– Ukiortaarsioriat akikinngitsunik misigisassarsioriarput. Peqataasut ilaasa Ilulissani ukiortaarsiornissamut 20.000 koruunit sinnerlugit atorpaat, siunissami inuussutissarsiutitut neriunaateqarluarneranik takussutissiivoq. Ilulissani ukioq kaajallallugu takornarialerinissamut aamma tikkuussivoq. Ilulissani misigisassaqarluarpoq – aamma ukiup taarnerpaaffiani.
– World of Greenland suleqatigalugu misigisassarsiorfissanik pilersaarusiornikuuvugut, assersuutigalugu qimusserneq, taamaalilluni tikeraat aningaasaatiminnik misigisassaqarluarniassammata, Morten Nielsen oqarpoq.
Oqaluttuaq tamaat aviisimi Sermitsiami sapaatip-akunnerani matumani saqqummersumi atuaruj. Ugguuna iserfigisinnaavat: