Takornariat Frankrigimeersut 40-t Ilulissani ukiortaarsiortut

- Arlaannattaluunniit Kalaallit Nunaat ukiukkut tikeraarnikuunngilaa, taamaammat misigisassatsialaavoq, François Leloustre Ilulissani ukiortaarsiorniaq oqarpoq.

Qaanaap avannaatungaani Smithsundimi aasaq assilisaq. Grands-Espaces-ip umiarsuaata Ocean Novap saamiatungaani seeqqorsimavoq. François Leloustre

Ilulissat iluliarujussuit qeqqanni, ukiukkut qaallorisseruttornerani arsarnerillu malittullusooq aalasut ataanni ukiortaarsiorfigissallugu tulluarpoq. Frankigimiu François Leloustre decembarip 29-ani, nunaqqatini allat 40-t ilagalugit, Ilulissiassapput ulluni sisamani ukiortaarsioriartorlutik.

Aviisi Sermitsiaq taama allappoq.

François Leloustre Fankrigip angalanermut aaqqissuisarfiani, Grands Espacesimi, sulisuuvoq. Taakku Spitzbergenimiit Kalaallit Nunaannut umiarsuarnik takornariartaatinik angalanerit ilaatigut aaqqissuuttarpaat, ukioq mannamiillu Qeqertarsuup Tunuani Qaanaamullu tikittalerlutik. Grands Espaces ukioq manna ukiunik 25-nngortorsiortoq ukiut tamaasa nunarsuup ilaanut ukiortaarsioriarnissanik aaqqissuussisarpoq, ukioq mannalu Ilulissani ukiortaarsiortitsissallutik.

François Leloustre 2015-imi Kalaallit Nunaanneeqqaarpoq, kingornalu tamaannartuartarsimalluni Qaanaaq Siorapalullu nuannarilluinnarlugit. Tikeraarnerit maajimi septembarimilu pisarput – taamaammat François Leloustre tikeraaqatissaallu perngaammik Kalaallit Nunaat ukiuunerani tikissavaat.

- Kalaallit Nunaat nuannareqaara, nuna tupinnartuliaq inuilu ilakkuminartut. Tikeraaqatissakka ukiukkut Kalaallit Nunaanniinnikuunngisaannarput taamaammat misigisassatsialaavoq nuannersoq, oqarpoq.

Aviisimi Sermitsiami atuarnerusinnaavutit. Aviisi uani pissarsiariuk:

Powered by Labrador CMS