Takornariat ataqqinninngitsut Islandimiut qatsulluinnarpaat
Instagramikkut assit saqqummiunneqarsimasut 10 millionit sinnillit pissutigalugit Island takornarianit feeriarfissatut nuannarineqarlualersimavoq. Torrallaallutik assileerusuttarput.
Takornariat ataqqinninngilluinnartut akisussaassuseqanngitsullu Islandimiut qatsulluinnaraat nunatsinni tusarnartaajunnaareerpoq, assersuutigalugu Alexander Tikhomovitut ittut.
Aviisi Sermitsiaq taama allappoq.
Russeq taanna Instagrammimi 320.000-inik malinnaasoqarpoq. Isikkivinnik nalissaqanngitsunik, imaluunniit arnanik atisaqarpianngitsunik Islandimi assilisaminik ilanngussinerit tamaasa like-rpassuaqartarpoq.
Isornartorsiorneqangaatsiartoq
Alexander Tikhomorov qanittukkut Islandimiunit russinillu sakkortuumik isornartorsiorneqarpoq biilinik off-roadinik mianersuaatsumik nunaannakkut biilersimanini pissutigalugu. Tamannalu Islandimi inerteqqutaavoq.
Islandip avannamut kangiani Mýtvatnimi nunami lavamik pinngortinneqarsimasumi aqitsumi biilia marrissimavoq. Russeq taanna biilip saavanut inissilluni imminut
assilisimavoq.
Instagrammimi allappoq politiinit Amerikamiut dollariinik 5.000-inik, tassa 33.000 koruuninik, akiligassinneqarsimalluni.
- Politiinik biilinillu attartortitsisarfinnik ajornartorsiuteqartarsimaqaanga, 5.000
dollarinillu akileereersimavunga. Sulilu amerlanerusunik perusupput.
Facebookimi kanalit arlallit takkussimapput, tamakkunanilu Islandimiut takornariat pissusilersornerluttarnerannik assilisatik aveqatigiissutigisarpaat, taamatut allappoq BBC. Assini takuneqarsinnaapput takornariat ernguttut, sermimi issiasut pinngortitamilu sunnertiasumi pisuttuartut.
Allaaserisaq tamaat aviisimi Sermitsiami atuarsinnaavat – aviisi uani ataani pissarsiariuk: