Takornariat allallu maani unnuisinnaalissapput
Uummannami Avani Homes akunnittarfimmi inissianik sanaartornermik suliniummut 10 millioner koruunit missaannik akeqartussamut Nalik Venturesimi aningaasatigut tapiiffigineqarsimavoq.
Uummannami tikeraat illoqarfimmi unnuinissamut suli pitsaanerusunik periarfissaqalingajalerput. Ingerlatseqatigiiffik sinnerlugu sanaartornermik ingerlatsisup akunnittarfimmi inissianik nutaanik arfineq-marlunnik sanaartornini ukiup matuma ingerlanerani aallartissagaa Avane Homesimit naatsorsuutigineqarpoq. Taamaalilluni suliffeqarfiup Uummannami unnuisarfiit annersaattut inissisimaffini annertusaqqissavaa.
Aviisi Sermitsiaq taama allappoq.
Sanaartornerup 2024-p naanerani naammassinissaa neriuutigaarput. Suliniut 10 millioner koruunit missaannik akeqarpoq, pisortaq piginneqataasorlu Anton Overballe oqarpoq.
Suliffeqarfik ilaqutariinnit pigineqartoq ineeqqanik, akunnittarfimmi inissianik illunillu inunnut piffissani sivikinnerusumi suliartorlutik Uummannamut tikittartunut takornarianullu attartortitsisarpoq.
Tikeraat Avani Homesimi ilaatigut illu aappaluttumik qalipaatilik,”Tatsip Akuanut”, ”Det Blå Hus” aamma ”Det Røde Hus”, asseqanngitsumik isikkivigissut, najugaqarfigisinnaavaat.
Allilerineq annertooq
- Ullumikkut illuni arfineq-marlunni 30-nik siniffiuteqarpugut illunilu nutaani arfineq-marlunni akunnittarfimmi inissianik arfineq-marlunnik katillugit 25-nik siniffittalinnik allilerilluta, taamaalillutalu 55-inik siniffiuteqalissalluta, pisortaq oqarpoq.
Nalik Venturesimit tapiiffigineqarnermigut Avani Homes ilaatigut sanaartugassat pilersaarusiornissaannut akissaqalersimavoq missingersuutinilu piviusorsiortuni ilaatigut kukkunersiuisumut illussanillu titartaasartumut, nunaminertamik tunineqarnermut sanaartornermullu akuersissutinut aningaasartuutinik ilaannakuusumik matussusiisinnaalersimalluni.
Aviisimi Sermitsiami atuarnerusinnaavutit. Aviisi uani pissarsiarisinnaavat:
